გიორგი სოსიაშვილი Fitch Ratings-ის ანგარიშზე: როდესაც ქვეყანაში არის მშვიდობა, სტაბილური სიტუაცია, სახეზე გვაქვს ეკონომიკური ზრდა
როდესაც ქვეყანაში არის მშვიდობა, სტაბილური სიტუაცია, სახეზე გვაქვს ეკონომიკური ზრდა, - განაცხადა განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა გიორგი სოსიაშვილმა Fitch Ratings-ის ანგარიშთან დაკავშირებით.
კერძოდ, საკრედიტო სააგენტო Fitch Ratings-მა საქართველოს სუვერენული რეიტინგი შეაფასა და სხვადასხვა ფაქტორის გათვალისწინებით რეიტინგი კვლავ უცვლელად, BB დონეზე დატოვა. ამასთან, დაადასტურა სტაბილური პერსპექტივა.
„ყველა ხედავს მთელ მსოფლიოში, რომ ჩვენი ხელისუფლების ძალიან ბრძნული, ჭკვიანური და შორსმჭვრეტელი პოლიტიკიდან გამომდინარე საქართველო მშვიდობის კუნძულად გადაიქცა. ამ ტურბულენტურ სიტუაციებში ვმოქმედებთ ისე, რომ ჩვენს ხალხს არანაირი საფრთხე არ დაემუქროს.
შედეგი სწორედ ამ რეიტინგებითაც არის გამოხატული. ვგულისხმობ, როდესაც ქვეყანაში არის მშვიდობა, სტაბილური სიტუაცია, სახეზე გვაქვს ეკონომიკური ზრდა“, - აღნიშნა გიორგი სოსიაშვილმა.
იმედი
წყარო: imedinews.ge