გიორგი ვოლსკი საქართველო-აშშ-ს ურთიერთობაზე: ჩვენს მომავალს თანამშრომლობაში ვხედავთ, წინააღმდეგ შემთხვევაში არათუ საქართველოს, არამედ კაცობრიობას არ უწერია გადარჩენა

საქართველოს პარლამენტის თავმჯდომარის პირველმა მოადგილემ, გიორგი ვოლსკიმ აშშ-ს პრეზიდენტის, დონალდ ტრამპის წერილსა და საქართველო-ამერიკის ურთიერთობებზე „დღის ქრონიკაში“ ისაუბრა.

ვოლსკი მიიჩნევს, რომ საქართველოსა და აშშ-ს შორის მეგობრული ურთიერთობები განახლდება.

„ჩვენს მომავალს თანამშრომლობაში ვხედავთ, წინააღმდეგ შემთხვევაში არათუ საქართველოს, არამედ კაცობრიობას არ უწერია გადარჩენა. ახლაც აშშ-ს დელეგაცია აქ არის და [რადიკალურ ოპოზიციას] უნდათ აჩვენონ, რომ ეს არის საზოგადოება და ამ საზოგადოების დიდი ნაწილი თითქოს ის არის, რომელიც აგრესიული მოქმედებებითა და რიტორიკით გამოირჩევა. მათი აქ ყოფნის პერიოდში უფრო მეტად მოინდომებენ, რომ თავი დაანახონ“, - აღნიშნა გიორგი ვოლსკიმ.

ამერიკის შეერთებული შტატების პრეზიდენტი დონალდ ტრამპი, საქართველოს პრეზიდენტს დამოუკიდებლობის დღეს ულოცავს. როგორც აშშ-ის პრეზიდენტის მილოცვაშია ნათქვამი, ეს წელი ახალ შესაძლებლობებს იძლევა ამერიკელ და ქართველ ხალხს შორის მეგობრული კავშირების განსაახლებლად და ჩვენი ქვეყნების უსაფრთხოებისა და კეთილდღეობის ხელშეწყობისთვის.