გივი მიქანაძე: არ უნდა არსებობდეს არცერთი პასუხგაუცემელი კითხვა. ჩვენი მიზანია საზოგადოება მაქსიმალურად იყოს ინფორმირებული ყველა იმ ნაბიჯზე, ყველა იმ საკითხზე, რომელიც რეფორმის ფარგლებში ხორციელდება

ჩვენი მიზანია საზოგადოება მაქსიმალურად იყოს ინფორმირებული ყველა იმ ნაბიჯზე, ყველა იმ საკითხზე, რომელიც რეფორმის ფარგლებში ხორციელდება, - განაცხადა გადაცემაში „ღია ეთერი“ საქართველოს განათლების, მეცნიერებისა და ახალგაზრდობის მინისტრმა გივი მიქანაძემ.

მინისტრის თქმით, ორივე სფეროში, ეს იქნება უმაღლესი თუ ზოგადი განათლება, ხელისუფლებას მართლაც ფუნდამენტური რეფორმა აქვს დაწყებული.

„დიდი მადლობა ამ ფორმატის შემოთავაზებისთვის. ძალიან მნიშვნელოვანია, რომ საზოგადოება მაქსიმალურად ჩართული იყოს რეფორმასთან დაკავშირებულ პროცესში. რა თქმა უნდა, არ უნდა არსებობდეს არცერთი პასუხგაუცემელი კითხვა. ჩვენი მიზანია საზოგადოება მაქსიმალურად იყოს ინფორმირებული ყველა იმ ნაბიჯზე, ყველა იმ საკითხზე, რომელიც რეფორმის ფარგლებში ხორციელდება. მით უმეტეს, რომ ორივე მიმართულებით, ეს იქნება უმაღლესი თუ ზოგადი განათლება, ჩვენ გვაქვს მართლაც ფუნდამენტური რეფორმა დაწყებული. შეიძლება ითქვას, რომ რამდენიმე თვეში ის ერთწლიანი პერიოდი იკვრება, თუმცა ახლა ჩვენ რამდენიმე დღეში ახალ სასწავლო წელს ვიწყებთ. პირველი, ეს არის სასკოლო მიმართულება და სულ რაღაც ერთ კვირაში უკვე საუნივერსიტეტო მიმართულებაც დაიწყებს სასწავლო წელს.

პირველ რიგში, ვისარგებლებ შემთხვევით და ყველას მივულოცავ ახალი სასწავლო წლის დაწყებას. განსაკუთრებით მივულოცავ პირველკლასელებს და იმ ახალგაზრდებს, რომლებმაც სტუდენტის სტატუსი მოიპოვეს, პირველად შეაბიჯებენ უმაღლეს სასწავლებლებში, მიუსხდებიან აუდიტორიებში მერხებს. ყველას მინდა ბევრი წარმატება ვუსურვო, ვინაიდან განათლება არის უმნიშვნელოვანესი და უმთავრესი, ფუნდამენტური მონაპოვარი, რომელიც მაქსიმალურად ქმნის ჩვენი ქვეყნის წინსვლას და მდგრადობას“, - აღნიშნა მინისტრმა.