გივი მიქანაძე: შეიქმნა ინკლუზიისა და სტრატეგიის დეპარტამენტი, რომლითაც სამინისტროს მხრიდან გამოიკვეთა ამ საკითხზე განსაკუთრებული ყურადღების კონცენტრირება

რეფორმის ის კონცეფცია, რომელიც ჩვენ გასული წლის 2 დეკემბერს საჯაროდ წარვადგინეთ და შემდეგ 2-თვიანი განხილვების შემდეგ მთავრობამ დადგენილებით დაამტკიცა, 8 გამოწვევაზეა ორიენტირებული. 8 გამოწვევიდან ერთ-ერთი არის ინკლუზიის კომპონენტი. ჩვენ პრიორიტეტულად გამოვყავით ეს მიმართულება, - განაცხადა განათლების მინისტრმა გივი მიქანაძემ გადაცემაში „ღია ეთერი“.

მინისტრმა აღნიშნა, რომ შეიქმნა ინკლუზიისა და სტრატეგიის დეპარტამენტი, რომლითაც გამოიკვეთა სამინისტროს მხრიდან ამ საკითხზე განსაკუთრებული ყურადღების კონცენტრირება.

„მიუხედავად იმისა, რომ გარკვეული სერვისები, განსაკუთრებით, სკოლის დონეზე განვითარებულია, ვხედავთ, რომ ბევრი სამუშაო გვაქვს როგორც სკოლამდელი, ასევე სკოლის, პროფესიულის და უმაღლესის მხრივ.

წარმოუდგენელი შრომა არის ჩადებული და მინდა უდიდესი მადლიერება გამოვხატო პედაგოგების, განსაკუთრებით, სპეცპედაგოგების მიმართ, რომლებიც, ბავშვებთან, რომლებიც მათ მხარდაჭერას საჭიროებენ, დღეს და ღამეს ატარებენ, მათთან ერთად არსებობენ.

სკოლებში შექმნილი გვაქვს რესურსოთახები, სადაც ბავშვებთან შესაბამისი მუშაობა მიმდინარეობს, მაგრამ ვხედავთ, რომ მეტი სპეციალისტისა და მეტი მხარდაჭერის საჭიროებაა. ამიტომ ჩვენ მივიღეთ გადაწყვეტილება, რომ რეფორმის ფარგლებში ყველა მასწავლებელი გადავამზადოთ შესაბამისი უნარებით, რომ მათ შეეძლოთ უფრო მეტად შეუწყონ ხელი ბავშვის ინტეგრირებას სასწავლო პროცესში“, - აღნიშნა გივი მიქანაძემ.