იოსებ ჩახვაშვილი: ამ ოთხი წლის განმავლობაში სამწუხაროდ, გერმანიის ელჩმა ვერანაირი პოზიტიური ქმედება ვერ განახორციელა საქართველოში - მხოლოდ დესტრუქცია და უპატივცემულობა მთავრობის მიმართ, რომელიც უარყოფითად აისახა ორი ქვეყნის ურთიერთობაზე

პეტერ ფიშერის მოღვაწეობას საქართველოში მხოლოდ და მხოლოდ ნეგატიურად ვაფასებ. ამ ოთხი წლის განმავლობაში სამწუხაროდ, გერმანიის ელჩმა ვერანაირი პოზიტიური ქმედება ვერ განახორციელა საქართველოში - მხოლოდ დესტრუქცია და უპატივცემულობა მთავრობის მიმართ, რომელიც უარყოფითად აისახა ორი ქვეყნის ურთიერთობაზე, - განაცხადა გადაცემაში „EURO ანატომია“ დიპლომატმა იოსებ ჩახვაშვილმა საქართველოში გერმანიის ელჩ პეტერ ფიშერზე საუბრისას.

მისივე თქმით, საქართველოს გერმანიასთან განსაკუთრებული ურთიერთობა ჰქონდა და ეს ურთიერთობა დაიწყო ჯერ კიდევ მე-19 საუკუნეში, როდესაც საქართველო რუსეთის იმპერიის ნაწილი იყო.

„ფიშერმა იცოდა საერთო სულისკვეთება, რაც მოდიოდა ევროკავშირის ხელმძღვანელობიდან, ის პოლიტიკა, რომელსაც ევროკავშირი ბოლო წლების განმავლობაში ახორციელებს ჩვენი სახელმწიფოს წინააღმდეგ, გარკვეული დაუსჯელობის გრძნობა ჰქონდა. იცოდა, რომ ჩვენი სახელმწიფო არ გადადგამდა რადიკალურ ნაბიჯებს და საკადრის პასუხს არ გასცემდა ფიშერს პიროვნული აქტივობების გამო.

სახელმწიფოს შეუძლია, რომ გააძევოს თავისი ქვეყნიდან მისთვის მიუღებელი პიროვნება, რომელიც ელჩის ფუნქციას ასრულებს, მაგრამ წინასწარ იცოდნენ, რომ ჩვენი მთავრობა ამ ნაბიჯს არ გადადგამდა, რომ არ დაეზიანებინა ის ურთიერთობები, რომელიც საქართველოს ევროკავშირთან გააჩნია. ამ თმენის პოლიტიკას ისინი ბოროტად იყენებდნენ“, - აღნიშნა იოსებ ჩახვაშვილმა.