ირაკლი ბენდელიანი: მერიის ყველა სამსახური, გამგეობები, ინფრასტრუქტურის სამსახური, თბილსერვისი პრობლემის დაწყებისთანავე გამოსულები ვართ. ასევე მნიშვნელოვანია, რომ მერიის ცხელ ხაზზე შემოსული არცერთი შეტყობინება რეაგირების გარეშე არ გვრჩება

მერიის ცხელ ხაზზე შემოსული არცერთი შეტყობინება რეაგირების გარეშე არ გვრჩება, - განაცხადა დედაქალაქის მერის მოადგილემ, ირაკლი ბენდელიანმა ვიდეომიმართვისას ძლიერი წვიმის შედეგად შექმნილ პრობლემასთან დაკავშირებით. ადგილზე იმყოფება თბილისის მერი კახა კალაძე.

ბენდელიანის თქმით, ყველაზე პრობლემური ადგილი იყო დიდ დიღომში, გუდვილის მიმდებარე ტერიტორიაზე.

„ყველაზე პრობლემური ადგილი გვქონდა დიდ დიღომში, გუდვილის მიმდებარე ტერიტორიაზე. ასევე, სოფელ დიღომში იყო რამდენიმე ლოკაცია. გარდა მაგის, იყო უნივერსიტეტისა და თამარაშვილის ქუჩების კვეთაზე, კონკრეტულად ახლა აქ მარჯვენა სანაპიროზე. ერისთავის ქუჩაზეა დასაწყისში, იქაც პრობლემა გვაქვს, თუმცა მინდა აღვნიშნო, რომ მერიის ყველა სამსახური, გამგეობები, ინფრასტრუქტურის სამსახური, თბილსერვისი პრობლემის დაწყებისთანავე გამოსულები ვართ. ასევე მნიშვნელოვანია, რომ მერიის ცხელ ხაზზე შემოსული არცერთი შეტყობინება რეაგირების გარეშე არ გვრჩება. როდესაც ნალექის რაოდენობა მოიკლებს და გზებზე შეტბორვები აღარ გვექნება, კონკრეტულ პრობლემურ ლოკაციებზე, უკვე დასუფთავების სამსახური დაიწყებს დაუყოვნებლივ მუშაობას, რათა დილისთვის რაც შეიძლება ნაკლები პრობლემა იყოს და გადაადგილება შეუფერხებელი იყოს“, - აღნიშნა მან.