ირაკლი ჭეიშვილი: ითხოვენ გამჭვირვალობის შესახებ კანონის, ოჯახური ღირებულებების შესახებ კანონის გაუქმებას, სანქციების დაწესებას, ვითომ პოლიტპატიმრების გათავისუფლებას. მსგავს საკითხებს როდესაც აყენებ ტექნიკურ ჯგუფთან, ესაა პოლიტიკური შინაარსის მატარებელი

მოთხოვნები, რასაც ბრიუსელი ტექნიკურ ჯგუფს უყენებს, ზუსტად ესაა პოლიტიკური შინაარსის მატარებელი, - განაცხადა საპარლამენტო უმრავლესობის წევრმა, ირაკლი ჭეიშვილმა „ქრონიკასთან“ საქართველოს დელეგაციასა და ევროკომისიის დელეგაციას შორის სავიზო დიალოგის ფარგლებში გამართულ შეხვედრასთან დაკავშირებით.

„მოთხოვნები, რასაც ბრიუსელი ტექნიკურ ჯგუფს უყენებს, ზუსტად ესაა პოლიტიკური შინაარსის მატარებელი. ითხოვენ გამჭვირვალობის შესახებ კანონის, ოჯახური ღირებულებების შესახებ კანონის გაუქმებას, სანქციების დაწესებას, ვითომ პოლიტპატიმრების გათავისუფლებას. მსგავს საკითხებს როდესაც აყენებ ტექნიკურ ჯგუფთან, ესაა პოლიტიკური შინაარსის მატარებელი შეხვედრა. სხვას არაფერს ველით - გადაწყვეტილებაც იქნება პოლიტიკურად დატვირთული“, - აღნიშნა ჭეიშვილმა.

„ქრონიკას“ საგარეო საქმეთა სამინისტროში განუცხადეს, რომ „საქართველოს მხარემ კიდევ ერთხელ დაადასტურა ევროკავშირთან ურთიერთპატივისცემაზე, თანასწორობასა და საერთო ინტერესებზე დაფუძნებული კონსტრუქციული თანამშრომლობის გაგრძელების მზაობა და ხაზი გაუსვა მაღალი დონის პოლიტიკური დიალოგის მნიშვნელობას“.