ირაკლი ყანდაშვილი: ვმუშაობთ იმაზე, რომ ადვოკატებმა იგრძნონ, ეს არის მათივე ასოციაცია, ისინი არიან ყოველდღიურად ჩართულები ამ პროცესებში და ჰქონდეთ ერთმანეთთან კიდევ უფრო მეტი კომუნიკაციის საშუალება
ვმუშაობთ იმაზე, რომ ადვოკატებმა იგრძნონ, ეს არის მათივე ასოციაცია, ისინი არიან ყოველდღიურად ჩართულები ამ პროცესებში და ჰქონდეთ ერთმანეთთან კიდევ უფრო მეტი კომუნიკაციის საშუალება, - განაცხადა გადაცემაში „დღის ქრონიკა“ საქართველოს ადვოკატთა ასოციაციის თავმჯდომარე ირაკლი ყანდაშვილმა.
მისი თქმით, ერთ-ერთი პრიორიტეტია ხელმისაწვდომობა ადვოკატთა ასოციაციის სერვისებზე.
„ძალიან ბევრი შეგვიძლია ვისაუბროთ ადვოკატთა ასოციაციის ყოველდღიური საქმიანობის ძირითად მიმართულებებზე, თუმცა ბოლო თვეებია, მათ შორის ჩემი თავმჯდომარეობის ფარგლებში, ჩვენ რამდენიმე ძირითადი მიმართულება გვაქვს. ერთი გახლავთ ადვოკატების ჩართულობა ასოციაციის მართვაში. შემიძლია გითხრათ, რომ როგორც თბილისის, ასევე მთელი რესპუბლიკის მასშტაბით შექმნილია დაახლოებით 50-მდე დარგობრივი კომიტეტი, სადაც ადვოკატებს ჩვენ ვაძლევთ საშუალებას, რომ ჩაერთონ, მათ შორის მონაწილეობა მიიღონ ადვოკატთა ასოციაციის საქმიანობაში.
შემდეგი პრიორიტეტი არის ხელმისაწვდომობა ადვოკატთა ასოციაციის სერვისებზე. ერთ-ერთი ძირითადი მიმართულება არის საგანმანათლებლო პროგრამები. ივლისის დღევანდელ დღემდე დაახლოებით 60-მდე ტრენინგი ჩავატარეთ და 1500 ადვოკატს საშუალება მივეცით, რომ გადამზადდნენ პროფესიული მიმართულებით.
მათ შორის, ჩვენი ერთ-ერთი მიმართულება არის ადვოკატების ჩართულობა და კომუნიკაცია. ახლა მე მოვდივარ ადვოკატთა ასოციაციის ერთ-ერთი სპორტული ღონისძიებიდან, სადაც დავაჯილდოვეთ პადელის ტურნირის გამარჯვებულები. წინა კვირას გვქონდა ფეხბურთის თასი. ვმუშაობთ იმაზე, რომ ადვოკატებმა იგრძნონ, ეს არის მათივე ასოციაცია, ისინი არიან ყოველდღიურად ჩართულები ამ პროცესებში და ჰქონდეთ ერთმანეთთან კიდევ უფრო მეტი კომუნიკაციის საშუალება“, - აღნიშნა მან.
იმედი
წყარო: imedinews.ge