ირაკლი კობახიძე: თუ ფორმალურად მაინც გინდა, რომ ჟურნალისტი გერქვას, ფორმალური სოლიდარობა მაინც უნდა გამოხატო კოლეგა ჟურნალისტის მიმართ, როგორც არ უნდა განეკუთვნებოდე კონკრეტულ პარტიულ ბანაკს, რასაც ჰქვია კოლექტიური „ნაცმოძრაობა“

თუ ფორმალურად მაინც გინდა, რომ ჟურნალისტი გერქვას, ფორმალური სოლიდარობა მაინც უნდა გამოხატო კოლეგა ჟურნალისტის მიმართ, როგორც არ უნდა განეკუთვნებოდე კონკრეტულ პარტიულ ბანაკს, რასაც ჰქვია კოლექტიური „ნაცმოძრაობა“, - განაცხადა საქართველოს პრემიერ-მინისტრმა ირაკლი კობახიძემ „იმედი LIVE“-ში.

მთავრობის მეთაურის თქმით, „ტვ პირველის“ და „ფორმულას“ ე.წ. ჟურნალისტებს უხაროდათ, რომ ტელეკომპანია „იმედს“ და „პოსტივის“ შეექმნებოდათ პრობლემები.

„გახსოვთ, როგორ ისტერიულად სვამდნენ კითხვებს ე.წ. ჟურნალისტები ჩვენს ქვეყანაში. აბსოლუტურად ყველანაირი სახე დაკარგეს. მახსოვს, იყო მომენტი, როდესაც „იმედის“, „პოსტივის“ და სხვა ტელევიზიების ჟურნალისტებმა სოლიდარობა გამოხატეს ამ ტელევიზიების წარმომადგენლების მიმართ, 5 ივლისის შემდეგ, როდესაც ამ ტელევიზიების წარმომადგენლებს ყველაზე მეტი ზიანი მიადგათ. ეს სოლიდარობა იყო აბსოლუტურად გულწრფელი. მაშინ ერთ-ერთმა დეპუტატმა კითხვა დაუსვა ჟურნალისტებს, პარლამენტის შენობაში, მათი მხრიდან რომ ასეთი სოლიდარობა იყო გამოხატული, საპირისპირო რომ მომხდარიყო, იგივეს იზამდნენ თუ არა „ტვ პირველის“, „მთავარის“ და „ფორმულას“ წარმომადგენლები.

ამაზე პასუხი იყო, რომ არ იზამდნენ, ამის მოლოდინი არ ჰქონდათ, მაგრამ ჩვენ მათ ვერ დავემსგავსებითო. ზუსტად ეს ვიხილეთ. თუ ფორმალურად მაინც გინდა, რომ ჟურნალისტი გერქვას, ფორმალური სოლიდარობა მაინც უნდა გამოხატო კოლეგა ჟურნალისტის მიმართ, როგორც არ უნდა განეკუთვნებოდე კონკრეტულ პარტიულ ბანაკს, რასაც ჰქვია კოლექტიური „ნაცმოძრაობა“. მე მახსოვს ე.წ ჟურნალისტების ისტერიკა. „ტვ პირველის“ და „ფორმულას“ ე.წ. ჟურნალისტების დაკარგული სახე, როგორ უხაროდათ ის, რომ ტელეკომპანია „იმედს“ და „პოსტივის“ შეექმნებოდათ პრობლემები. ეს იყო ოპტიმისტური მოლოდინი, მათ შორის, შესაბამისი ბრიტანელი ბიუროკრატების მხრიდან. ჩვენ მაშინვე დავპირდით ყველას, რომ ტელევიზიებს და მედიის თავისუფლებას საქართველოში არავითარი პრობლემა არ შეექმნებოდა.