ირანის პარლამენტის სპიკერი: ჩვენ არ ვენდობით ამერიკელებს - როგორც კი ამერიკელები დაარღვევენ შეთანხმებას, ჩვენ მზად ვიქნებით საყოველთაო თავდაცვისთვის

ირანის მთავარმა მომლაპარაკებელმა და პარლამენტის სპიკერმა, მოჰამად ბაღერ ყალიბაფმა განაცხადა, რომ თეირანი მზად არის „საყოველთაო თავდაცვისთვის“, იმ შემთხვევაში, თუ აშშ დაარღვევს გასულ თვეს ხელმოწერილ ურთიერთგაგების მემორანდუმს.

14-პუნქტიანი შეთანხმება ითვალისწინებს ჰორმუზის სრუტის გახსნისა და ირანისთვის დაწესებული გარკვეული ფინანსური შეზღუდვების შემსუბუქების პირობებს, ასევე განსაზღვრავს ირანის ბირთვულ პროგრამასთან დაკავშირებულ მოლოდინებს, რომლებიც სამომავლო ტექნიკური მოლაპარაკებების საგანი იქნება.

მემორანდუმის თანახმად, აშშ და ირანი ვალდებულებას იღებენ, შეწყვიტონ ცეცხლი „ყველა ფრონტზე“.

„ჩვენ არასდროს შეგვიწყვეტია ჩვენი ქვეყნის თავდაცვისთვის მზადება. როგორც კი ამერიკელები დაარღვევენ ამ შეთანხმებას, ჩვენ მზად ვიქნებით საყოველთაო თავდაცვისთვის“, - აღნიშნა მან.

„ჩვენ არ ვენდობით ამერიკელებს. მოლაპარაკებების დროს აშშ-ის ვიცე-პრეზიდენტს მკაფიოდ განვუცხადე, რომ მათ მიმართ ნდობა საერთოდ არ გვაქვს“, - დასძინა ყალიბაფმა.