ირანის საგარეო საქმეთა სამინისტროს სპიკერი: ლიბანის სუვერენიტეტისა და ტერიტორიული მთლიანობის პატივისცემა აშშ-თან გაფორმებული შუალედური შეთანხმების ნაწილია

ირანის საგარეო საქმეთა სამინისტროს სპიკერი, ესმაილ ბაღაი აცხადებს, რომ ლიბანის სუვერენიტეტისა და ტერიტორიული მთლიანობის პატივისცემა აშშ-თან გაფორმებული შუალედური შეთანხმების ნაწილია.

მისი ეს განცხადება მოჰყვა ისრაელის თავდაცვის მინისტრის, ისრაელ კაცის უფრო ადრინდელ სიტყვებს იმის შესახებ, რომ ისრაელი არ გაიყვანს თავის ძალებს სამხრეთ ლიბანიდან და გააგრძელებს მოქმედებებს რეგიონში ტერორისტული ინფრასტრუქტურის გასანადგურებლად.

ბაღაის თქმით, თეირანს კვლავ „ღრმა უნდობლობა“ აქვს შეერთებული შტატების მიმართ, მიუხედავად შეთანხმებული ჩარჩო ხელშეკრულებისა, რომელიც ომის დასრულებას ისახავს მიზნად.

„სამწუხაროდ, უნდა ვაღიაროთ, რომ ირანის ღრმა უნდობლობა შეერთებული შტატების მიმართ ამერიკელი ლიდერების მხრიდან დანაშაულებრივი ქმედებების ხანგრძლივი ისტორიიდან გამომდინარეობს“, - ამბობს ის.

„შეერთებულ შტატებს ჯერ კიდევ გრძელი გზა აქვს გასავლელი ირანელი ხალხის ნდობის მოსაპოვებლად“, - დასძინა სპიკერმა და აღნიშნა, რომ ეს ჩარჩო შეთანხმება „მხოლოდ ნაბიჯია დაძაბულობის შესამცირებლად და იმ ომის დასასრულებლად“, რომელიც თებერვლის ბოლოს დაიწყო.