ირანული მხარის მტკიცებით, ომანთან ჰორმუზის სრუტეში საზღვაო დერეფანზე შეთანხმება დასკვნით ეტაპზეა

ირანული მხარის განცხადებით, ჰორმუზის სრუტეში საზღვაო მიმოსვლის დერეფნის განსაზღვრასთან დაკავშირებით ომანთან მიმდინარე მოლაპარაკებები დასკვნით ეტაპზე გადავიდა. ინფორმაციას POLITICO ავრცელებს.

ირანის საგარეო საქმეთა სამინისტროს ინფორმაციით, დაგეგმილი საზღვაო მარშრუტი ძირითადად ირანის ტერიტორიულ წყლებში გაივლის, თუმცა მისი ნაწილი ომანის ტერიტორიულ წყლებსაც მოიცავს.

საგარეო საქმეთა სამინისტროს ოფიციალურმა წარმომადგენელმა ესმაილ ბაღაეიმ ჟურნალისტებს განუცხადა, რომ „შემოთავაზებული საზღვაო მარშრუტის გეოგრაფიული კოორდინატები ორივე მხარეს უკვე შეთანხმებული აქვს“. მისივე თქმით, ორმხრივი მოლაპარაკებების პროცესი „პროფესიონალურად და კონსტრუქციულად“ მიმდინარეობს.

აშშ-ის პრეზიდენტმა დონალდ ტრამპმა გასულ კვირას განაცხადა, რომ თეირანმა ვაშინგტონს სთხოვა, ირანის წინააღმდეგ ნებისმიერი სამხედრო მოქმედება გადაედო, ვიდრე ჰორმუზის სრუტესთან დაკავშირებული შეთანხმება დასრულდებოდა.

„ეს ასევე მოიცავს ჰორმუზის სრუტის დაუყოვნებლივ, სრულ და მთლიან გახსნას და ირანის ბირთვული საფრთხის დასრულებას“, - დაწერა ტრამპმა თავის სოციალურ ქსელში.

POLITICO-ს ცნობით, აშშ-მა 14 ივლისს ირანის პორტების საზღვაო ბლოკადა ხელახლა აამოქმედა, მას შემდეგ, რაც ორ ქვეყანას შორის სამხედრო დაპირისპირება განახლდა. მას შემდეგ ბლოკადა ცეცხლის შეწყვეტის შესახებ მოლაპარაკებების ერთ-ერთ მთავარ სადავო საკითხად იქცა. თეირანი აცხადებს, რომ ნებისმიერი ფართომასშტაბიანი შეთანხმების ფარგლებში მისი გაუქმება აუცილებელია.

ესმაილ ბაღაეის თქმით, ჰორმუზის სრუტე კვლავ დახურული რჩება აშშ-ისა და ისრაელის მიერ განხორციელებული სამხედრო დარტყმების შედეგად.