ჯანდაცვის მინისტრის ხელმძღვანელობით პირველი სამუშაო სხდომა გამართა საკოორდინაციო საბჭომ, რომელიც შეზღუდული შესაძლებლობის სტატუსის ბიოფსიქოსოციალური მოდელის დანერგვის ხელშეწყობის მიზნით შეიქმნა
ჯანდაცვის მინისტრის ხელმძღვანელობით პირველი სამუშაო სხდომა გამართა საკოორდინაციო საბჭომ, რომელიც შეზღუდული შესაძლებლობის სტატუსის ბიოფსიქოსოციალური მოდელის დანერგვის ხელშეწყობის მიზნით შეიქმნა. ინფორმაციას ჯანდაცვის სამინისტრო ავრცელებს.
თუ დღეს პირისთვის შეზღუდული შესაძლებლობის სტატუსის მინიჭება მხოლოდ სამედიცინო დიაგნოზის მიხედვით ხდება, ახალი მოდელი დაეფუძნება პირის ფუნქციონირების კომპლექსურ შეფასებას, სადაც გათვალისწინებული იქნება არა მხოლოდ ჯანმრთელობის მდგომარეობა, არამედ ფსიქოლოგიური და სოციალური ასპექტები, რაც გავლენას ახდენს ადამიანის ყოველდღიურ ცხოვრებაზე და მის საზოგადოებაში ჩართულობაზე.
აღნიშნული მიდგომა განსაზღვრულია „შეზღუდული შესაძლებლობის მქონე პირთა უფლებების შესახებ“ საქართველოს კანონით.
როგორც მიხეილ სარჯველაძემ აღნიშნა, ბიოფსიქოსოციალური მოდელით სტატუსის მინიჭების მიზანი შშმ პირთა უფლებების დაცვა, მათი საჭიროებების მაქსიმალურად დაკმაყოფილება და შესაბამისი სერვისების უზრუნველყოფაა.
შეხვედრაზე დაინტერესებულმა მხარეებმა ბიოფსიქოსოციალური მოდელის დანერგვისთვის მნიშვნელოვანი საკითხები განიხილეს, ამასთან, იმსჯელეს საბჭოს მუშაობის სპეციფიკაზე და შეთანხმდნენ შემდგომ ნაბიჯებზე.
როგორც სხდომაზე აღინიშნა, გადაწყვეტილებების მიღებისთვის საჭირო საკითხებს სამუშაო ჯგუფები მოამზადებენ და დაამუშავებენ, რაც საბჭოს მუშაობას უფრო ეფექტურს გახდის.
შეხვედრას ესწრებოდნენ საკოორდინაციო საბჭოს წევრები - ჯანდაცვის სამინისტროს, საქართველოს პარლამენტის, სხვადასხვა საჯარო უწყების, შეზღუდული შესაძლებლობის მქონე პირთა თემისა და დონორი ორგანიზაციების წარმომადგენლები, ასევე - მოწვეული სტუმრები.
იმედი
წყარო: imedinews.ge