ჯეი დი ვენსი: ირანთან შეთანხმება, შესაძლოა, მომდევნო კვირაში, ან რამდენიმე თვეში გაფორმდეს

აშშ-ის ვიცე-პრეზიდენტის ჯეი დი ვენსის განცხადებით, ირანთან სამშვიდობო შეთანხმება, შესაძლოა, მომდევნო კვირაში ან რამდენიმე თვეში გაფორმდეს.

„ვფიქრობ, ახლა ვართ იმ პოზიციაში, რომ გავაფორმებთ შეთანხმებას, რომელიც კარგი იქნება შეერთებული შტატებისთვის ეკონომიკურად, რომელიც ნამდვილად შეეხება ირანის ბირთვულ პროგრამას, არა მხოლოდ ახლა, ვიდრე დონალდ ტრამპი პრეზიდენტია, არამედ გრძელვადიან პერსპექტივაში, როცა ჩემი შვილები გაიზრდებიან და არ იტყვიან, რომ ირანი ბირთვული იარაღის შექმნას აპირებს. ეს არის მიზანი. ვფიქრობ, ძალიან ახლოს ვართ ამ მიზნის მიღწევასთან“, - განაცხადა ვენსმა.

ჟურნალისტის კითხვაზე, კონკრეტულად როდის გაფორმდება შეთანხმება და მოესწრება, თუ არა ის კონგრესში შემოდგომაზე დაგეგმილ შუალედურ არჩევნებს, ვენსმა უპასუხა, რომ ის, შესაძლოა, მომდევნო კვირას ან რამდენიმე თვეში დაიდოს.

„შეთანხმება შეიძლება მომდევნო კვირაში შედგეს, მაგრამ ასევე შეიძლება ეს თვეების შემდეგაც მოხდეს“, - აღნიშნა ვენსმა.