ჯეი დი ვენსი ირანთან შეთანხმებას დადებითად აფასებს, თუმცა აღნიშნავს, რომ სამუშაო კიდევ ბევრია

აშშ-ის ვიცე-პრეზიდენტმა, ჯეი დი ვენსმა კვირას ირანთან მიღწეულ შეთანხმებას „ამერიკის შეერთებული შტატებისთვის დიდი მომენტი“ უწოდა, თუმცა აღნიშნა, რომ სამუშაო კიდევ ბევრია.

„არ ვაპირებ იმის თქმას, რომ ხვალვე ყველანი საყოველთაო მშვიდობის ჰიმნს შევასრულებთ“, - განაცხადა ვენსმა Fox News-ის ეთერში. „მშვიდობიანი თანაარსებობის სწავლას გარკვეული დრო დასჭირდება, თუმცა ვფიქრობ, რომ ამ ღამით ძალიან, ძალიან დიდი ნაბიჯი გადავდგით“.

ვენსის თქმით, შეთანხმება სამ ძირითად ელემენტზეა დაფუძნებული. პირველი - „ეს არის ჰორმუზის სრუტის დაუყოვნებლივ გახსნა და, რა თქმა უნდა, მასთან ერთად იმ საზღვაო ბლოკადის მოხსნაც, რომელიც ირანს დავუწესეთ“.

მისივე თქმით, მეორე ელემენტია იმის გარანტია, რომ ირანი არასოდეს შეეცდება ბირთვული იარაღის შექმნას, მოპოვებას ან შეძენას. მესამე ელემენტად კი მან პირობების შესრულება დაასახელა.

„სრულიად ნათელი რომ იყოს - ეს ყველაფერი მხოლოდ იმ შემთხვევაში მოხდება, თუ ირანი თავის დაპირებას შეასრულებს“, - აღნიშნა ვენსმა.

ვიცე-პრეზიდენტმა ასევე ხაზი გაუსვა ამ ნაბიჯის პოზიტიურ ეკონომიკურ გავლენას ამერიკელ მომხმარებლებზე, რომლებიც თვეების განმავლობაში საწვავზე მაღალი ფასებით ზარალდებოდნენ.

„ამერიკელი ხალხისთვის ჩემი მთავარი სათქმელი ალბათ მადლობაა. თქვენი მოთმინების წყალობით, ვფიქრობ, ჩვენ გადავჭერით პრობლემა, რომელიც ამ ქვეყანას ათწლეულების განმავლობაში სტანჯავდა“, - განაცხადა მან.

ვენსის თქმით, ტრამპი „რა თქმა უნდა, ძალიან შეშფოთებული იყო“ საწვავის მაღალი ფასებით, „თუმცა ახლა ჩვენ შევძლებთ ენერგორესურსების ღირებულების შემცირებას არა მხოლოდ მოკლევადიან პერსპექტივაში, არამედ გრძელვადიანადაც“.