ჯორჯია მელონიმ კვიპროსში ვიზიტი მოდენაში მომხდარი ტრაგედიის გამო გააუქმა, სადაც ავტომობილი ქვეითებს დაეჯახა
იტალიის პრემიერ-მინისტრი ჯორჯია მელონი დღეს მოდენას ეწვევა, სადაც ავტომობილის ქვეითთა ჯგუფში შეჭრის შედეგად 8 ადამიანი დაშავდა.
როგორც აღინიშნა, მოდენაში გამგზავრების გამო, მელონის ნიქოზიაში კვიპროსის პრეზიდენტთან შეხვედრის გაუქმება მოუწია. მოდენას ასევე ეწვევა იტალიის პრეზიდენტი სერჯო მატარელა.
მოდენის პროკურატურის განცხადებით, ეჭვმიტანილის მიმართ გამოძიება მასობრივი მკვლელობის მცდელობისა და სხეულის დაზიანების მიყენების მუხლით მიმდინარეობს. ამჟამად მიმდინარეობს ღონისძიებები მისი ქმედების მოტივის დასადგენად.
16 მაისს, მოდენის ცენტრში, ავტომობილის მძღოლი დიდი სიჩქარით შეიჭრა ფეხით მოსიარულეთა ჯგუფში. ინციდენტის შედეგად 8 ადამიანი დაშავდა, მათგან ოთხის მდგომარეობა მძიმეა. სამი მათგანის რეანიმირება ადგილზევე გახდა საჭირო, ორ დაშავებულს კი ფეხების ამპუტაცია დასჭირდა.
იმედი
წყარო: imedinews.ge