ჯორჯია მელონის განცხადებით, ევროკავშირს უკრაინის საკითხზე რუსეთთან მოლაპარაკებაში ერთი წარმომადგენელი უნდა ჰყავდეს

იტალიის პრემიერ-მინისტრი ჯორჯია მელონი აცხადებს, რომ ევროკავშირს უკრაინის საკითხზე რუსეთთან მოლაპარაკებაში ერთი წარმომადგენელი უნდა ჰყავდეს.

იტალიის პარლამენტში სიტყვით გამოსვლისას, მელონიმ აღნიშნა, რომ ეს უნდა იყოს ავტორიტეტული ფიგურა, რომელსაც ევროკავშირის ყველა წევრი სახელმწიფო ენდობა და შეძლებს გადასცეს რუსეთს ევროპის ერთიანი პოზიცია.

მელონიმ ცოტა ხნის წინ ლონდონში გამართული საფრანგეთის, დიდი ბრიტანეთისა და გერმანიის ლიდერების შეხვედრაც გააკრიტიკა და თქვა, რომ უკრაინაში სამშვიდობო პროცესისთვის ცალკეული ფორმატების შექმნა გაურკვევლობას, დაბნეულობასა და ევროპული პოზიციის სისუსტეს იწვევს.

„უკრაინასა და რუსეთს შორის ნებისმიერი სერიოზული სამშვიდობო შეთანხმების შემთხვევაში რიგი პირობები დამოკიდებულია ევროპაზე, ეხება ევროპას, გავლენას ახდენს ევროპაზე და სწორედ ევროპას მოუწევს მათზე მოლაპარაკება. მე ვგულისხმობ, რომ ჩვენი სიმტკიცე რუსეთის მიმართ დიპლომატიურ სიბრმავეში, ან თვითიზოლაციაში არ უნდა გადაიზარდოს, ამიტომ ევროპის პოზიციის წარსადგენად აუცილებელია შევარჩიოთ ავტორიტეტული ფიგურა, რომელსაც ევროკავშირის ნდობა და მანდატი ექნება“, - განაცხადა მელონიმ.