კაია კალასი ისრაელის საგარეო საქმეთა მინისტრს პასუხობს - ევროკავშირმა დაგმო დასავლეთ სანაპიროზე ისრაელის მიერ განხორციელებული უკანონო დასახლებების გაფართოება

ევროკავშირის უმაღლესმა წარმომადგენელმა კაია კალასმა ისრაელის საგარეო საქმეთა მინისტრს გიდეონ საარს, რომელმაც მასთან ოფიციალური კონტაქტების გაწყვეტის შესახებ განაცხადა, მიმართა და აღნიშნა, რომ ბრიუსელმა დაგმო დასავლეთ სანაპიროზე ისრაელის მიერ განხორციელებული უკანონო დასახლებების გაფართოება.

ამასთან ერთად, კალასი ამბობს, რომ დიდ მნიშვნელობას ანიჭებს ისრაელთან დიალოგსა და თანამშრომლობას და მზად არის, ეს ურთიერთობა მომავალშიც ამ სულისკვეთებით, პატივისცემისა და კონსტრუქციული თანამშრომლობის საფუძველზე გააგრძელოს.

„ძვირფასო გიდეონ, როგორც იცით, ევროკავშირსა და ისრაელს ბევრი რამ აკავშირებს. დიდ მნიშვნელობას ვანიჭებ ჩვენს დიალოგსა და თანამშრომლობას და მზად ვარ, ეს ურთიერთობა მომავალშიც სწორედ ამ სულისკვეთებით, პატივისცემისა და კონსტრუქციული თანამშრომლობის საფუძველზე გაგრძელდეს. დიალოგი დიპლომატიის საფუძველია, განსაკუთრებით მაშინ, როდესაც განსხვავებული პოზიციები არსებობს. ევროკავშირი ყოველთვის ერთგულია ისრაელთან კონსტრუქციული ურთიერთობების შენარჩუნების.

ახლო აღმოსავლეთში მშვიდობის მისაღწევად, ორი სახელმწიფოს პრინციპზე დაფუძნებული გადაწყვეტა კვლავ ერთადერთ სიცოცხლისუნარიან გზად რჩება. ევროკავშირმა დაგმო დასავლეთ სანაპიროზე ისრაელის მიერ განხორციელებული უკანონო დასახლებების გაფართოება, რაც ამ მიზნის მიღწევას სულ უფრო ართულებს. ეს არის ევროკავშირის ოფიციალური პოზიცია“, - დაწერა კალასმა.

ცნობისთვის, ისრაელის საგარეო საქმეთა მინისტრმა დღეს განაცხადა, რომ ის კალასთან ყველა კონტაქტს წყვეტს. როგორც საარმა განმარტა, ეს ნაბიჯი გამოწვეულია იმით, რომ რამდენიმე დღის წინ კალასმა მექსიკაში ვიზიტის დროს ისრაელი სამხრეთ აფრიკის რესპუბლიკაში ადრე მოქმედ აპარტეიდის რასისტულ რეჟიმს შეადარა.

Dear Gideon, as you know, the EU and Israel have a lot that binds us. I value our dialogue and engagement, and I’m open to continue in that spirit, respectfully and constructively. Dialogue is the foundation of diplomacy, especially when differences arise. The EU is always… — Kaja Kallas (@kajakallas) June 18, 2026