ლავროვი: ევროკავშირის შიდა პრობლემების თვალსაზრისით, შესაძლოა ცუდიც არ იყოს, იქ უკრაინა რომ შევიდეს - ისინი მაშინ უბრალოდ დაიშლებიან

ევროკავშირი შესაძლოა „უბრალოდ დაიშალოს“, თუ მასში უკრაინა გაწევრიანდება. ამის შესახებ რუსეთის საგარეო საქმეთა მინისტრმა, სერგეი ლავროვმა განაცხადა.

„ევროკავშირის შიდა პრობლემების თვალსაზრისით, შესაძლოა ცუდიც არ იყოს, იქ უკრაინა რომ შევიდეს, ისინი მაშინ უბრალოდ დაიშლებიან. ასე რომ, ბევრი წინააღმდეგობრივი ტენდენციაა“, - აღნიშნა მან თურქეთის საგარეო საქმეთა მინისტრ ჰაქან ფიდანთან მოლაპარაკებების შემდგომ გამართულ პრესკონფერენციაზე.

„თუ მათ სურთ, დაშალონ თავიანთი ეკონომიკური მრავალმხრივი სტრუქტურა და სამხედრო ბლოკად იქცნენ - ეს მათთვის ძალიან დიდი უსიამოვნებების მომტანი იქნება. ხოლო თუ მათ უბრალოდ ეკონომიკის დავიწყება სურთ, აი, მაშინ [ვოლოდიმირ] ზელენსკი უნდა მიიწვიონ იქ“, - აღნიშნა მან.

მანამდე ევროპული საბჭოს თავმჯდომარემ, ანტონიუ კოშტამ განაცხადა, რომ ევროკავშირმა და უკრაინამ ოფიციალურად დაიწყეს მოლაპარაკებები გაწევრიანების შესახებ ლუქსემბურგში გამართულ მთავრობათაშორის კონფერენციაზე.