„ლეიბორისტმა“ დეპუტატებმა სტარმერს გადადგომისკენ მოუწოდეს

ბრიტანეთის პრემიერ-მინისტრი, კირ სტარმერი ამტკიცებს, რომ ის პოსტზე რჩება, თუმცა მან სერიოზული დანაკარგები განიცადა მას შემდეგ, რაც 2024 წლის შემდეგ ბრიტანეთში ჩატარებული ყველაზე მასშტაბური არჩევნების შედეგები გამოქვეყნდა.

სტარმერის „ლეიბორისტულმა პარტიამ“ ინგლისში ამ დროისთვის 650-ზე მეტი მუნიციპალური მრჩევლის ადგილი დაკარგა, რითაც ძირითადად ნაიჯელ ფარაჯის მემარჯვენე-პოპულისტურმა პარტიამ ისარგებლა.

სტარმერმა, რომლის ლიდერობაც დიდი კითხვის ნიშნის ქვეშ დადგა, ჟურნალისტებს განუცხადა, რომ ის „არ წავა და ქვეყანას ქაოსში არ ჩაძირავს“. თუმცა, „ლეიბორისტული პარტიის“ არაერთმა დეპუტატმა მას მოუწოდა, პოსტი ახლავე ან უახლოეს მომავალში დატოვოს.

„ლეიბორისტებისთვის“ მდგომარეობა კიდევ უფრო მძიმეა უელსში, სადაც ნაციონალისტური პარტია Plaid Cymru, როგორც ჩანს, ყველაზე დიდი პარტია გახდება, ხოლო „ლეიბორისტმა“ პირველმა მინისტრმა საკუთარი მანდატი დაკარგა - ამით იქ „ლეიბორისტების“ ერთსაუკუნოვანი დომინაცია დასრულდა. შოტლანდიაში კი, პროგნოზების მიხედვით, ყველაზე მეტ ადგილს შოტლანდიის ნაციონალური პარტია (SNP) მოიპოვებს.