ლევან მაჭავარიანი: პოზიტიური სიგნალები უკვე კონკრეტულად მუშა რეჟიმში გადავიდა. კიდევ ერთ დელეგაციას ველოდებით მაისის თვეში და ძალიან ოპტიმისტურია განწყობა იმასთან დაკავშირებით, რომ აშშ-თან რეალური სტრატეგიული პარტნიორობა აღდგეს

როგორც კი მიდგომები შეიცვლება უშუალოდ ბრიუსელში, თავისთავად, ზუსტად ანალოგიურ ხასიათზე მოუწევთ დადგომა ბატონ ფიშერსაც და ბატონ ჰერცინსკისაც, - განაცხადა „დღის ქრონიკასთან“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა ბრიუსელთან სამომავლო ურთიერთობებზე საუბრისას.

მაჭავარიანმა ჰერჩინსკის მუქარის შემცველი განცხადება გაიხსენა, რომ „საქართველო ბნელ დროში დაბრუნდება“ და აღნიშნა, რომ სწორედ „ქართული ოცნებაა“, ბიძინა ივანიშვილის ხელმძღვანელობით, ჩვენს ქვეყანაში მშვიდობისა და სტაბილურობის ერთადერთი გარანტორი, რასაც მოქალაქეები კარგად იაზრებენ.

ამასთან მაჭავარიანმა პარალელი გაავლო აშშ-ის ადმინისტრაციასთან და ამ ქვეყნის საელჩოსთან საქართველოში და აღნიშნა, რომ მოქალაქეები ხედავენ, თუ როგორ უმჯობესდება ურთიერთობები ახალ ადმინისტრაციასთან და შესაბამისად, აშშ-ის საელჩოსთანაც.

„ძალიან პოზიტიური სიგნალებია. ეს პოზიტიური სიგნალები უკვე კონკრეტულად მუშა რეჟიმში გადავიდა. ჩვენ კიდევ ერთ დელეგაციას ველოდებით მაისის თვეში და ძალიან ოპტიმისტურია განწყობა იმასთან დაკავშირებით, რომ რეალური სტრატეგიული პარტნიორობა აღდგეს.

როდესაც წინა ადმინისტრაცია გვექცეოდა ზუსტად ანალოგიურად უსამართლოდ, როგორც დღევანდელი ევრობიუროკრატია, მაშინ კარგად გახსოვთ, მათი წარმომადგენლები საქართველოში, საელჩო ზუსტად ანალოგიურად იქცეოდა, როგორც იქცევა ბატონი ფიშერი, როგორც იქცევა ბატონი ჰერჩინსკი. თუმცა, შეიცვალა ადმინისტრაცია და აბსოლუტურად არანაირი ნეგატივი საელჩოსგან ჩვენ არ გვიგრძნია; არანაირი ქარდები არ დაუდიათ; არანაირი განცხადებები არ გაუკეთებიათ კრიტიკულ ჭრილში.

როგორც კი მიდგომები შეიცვლება უშუალოდ ბრიუსელში, თავისთავად, ზუსტად ანალოგიურ ხასიათზე მოუწევთ დადგომა ბატონ ფიშერსაც და ბატონ ჰერცინსკისაც“, - აღნიშნა მაჭავარიანმა.