ლევან მახაშვილი: ძალიან ბევრი კითხვის ნიშანი არსებობს როგორც კაია კალასისადმი, ასევე სხვა ბიუროკრატებისადმი, რომლებიც ამ იერარქიაში საქართველოზე აგებენ პასუხს - მაინც იმედიანად ვარ, რომ ადრე თუ გვიან ევროკავშირი საკუთარი შეცდომებიდან გამომდინარე, გადატვირთავს ამ ურთიერთობებს

სამწუხაროდ, ბრიუსელში ზოგიერთმა ინსტიტუტმა საქართველოსთან ურთიერთობების ერთგვარი მონოპოლიზება მოახდინა, განსაკუთრებით ვგულისხმობ კაია კალასის უწყებას, რომელმაც ხელში ჩაიგდო საქართველოსთან ურთიერთობის აწყობა თუ გაგრძელება, რაც არ გამოვიდა, - განაცხადა ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა გადაცემაში „დღის ქრონიკა“ საქართველოსა და ბრიუსელის ურთიერთობაზე საუბრისას.

მისი თქმით, ევროკავშირში ზოგიერთ წევრ ქვეყანას საქართველოსთან დაკავშირებით ომის დღის წესრიგით ნაკარნახევი მიზნები აქვს.

„არის ზოგიერთი წევრი სახელმწიფო - ცალკეული ბალტიისპირეთის სახელმწიფოები და ზოგი სახელმწიფო ჩრდილოეთ ევროპაში, რომლებსაც ძალიან ვიწროპოლიტიკური, ომის დღის წესრიგით ნაკარნახევი მიზნები აქვთ საქართველოსთან დაკავშირებით. ისინი საქართველოს ხედავენ არა როგორც თანასწორ პარტნიორს, რომელსაც აქვს თავისი ინტერესები და რომლის ინტერესებიც შეიძლება, იყოს გათვალისწინებული. არამედ მათთვის საქართველო არის პირდაპირ ამ დიდი გეგმის კონკრეტული მოთამაშე, ერთი პაიკი, რომელიც მათი გადმოსახედიდან, უფრო დიდ მიზნებს უნდა შესწირონ.

მაგრამ ასე არ არის მთელს ევროკავშირში. არის სხვა ინტერესებიც, მათ შორის ევროკავშირის შიგნით, ბრიუსელში, ბრიუსელის ინსტიტუტებს შორისაც მნიშვნელოვანი ინსტიტუციური დაპირისპირებაა სწორედ იმიტომ, რომ ბევრმა დაინახა, რომ ის ნაბიჯები, რომლებიც იყო გადადგმული, მათ შორის საქართველოსთან დაკავშირებით, იყო მცდარი, არასწორი, როგორც პოლიტიკურად, ასევე სხვა გაგებითაც, რადგან ამან მოიტანა ის, რომ ევროკავშირის რეპუტაცია, ევროკავშირისადმი ნდობა შეილახა და ამის შემდგომი ნაბიჯები არის ის, რომ ისინი ცდილობენ ამ პოლიტიკის შეცვლას.

სამწუხაროდ, ბრიუსელში ზოგიერთმა ინსტიტუტმა საქართველოსთან ურთიერთობების ერთგვარი მონოპოლიზება მოახდინა, განსაკუთრებით ვგულისხმობ კაია კალასის უწყებას, რომელმაც ხელში ჩაიგდო საქართველოსთან ურთიერთობის აწყობა თუ გაგრძელება, რაც არ გამოვიდა. დღეს ცხადია, რომ ამან მოიტანა სრული ფიასკო და ამაზე ძალიან ბევრი კითხვის ნიშანი არსებობს როგორც კაია კალასისადმი, ასევე სხვა ბიუროკრატებისადმი, რომლებიც ამ იერარქიაში საქართველოზე აგებენ პასუხს და სწორედ ამიტომ ჩნდება ძალიან ბევრი კითხვის ნიშანი“, - განაცხადა ლევან მახაშვილმა.

ამასთან, დეპუტატი იმედს გამოთქვამს, რომ ევროკავშირი საქართველოსთან ურთიერთობებს გადატვირთავს.

„საბოლოო ჯამში მაინც იმედიანად ვარ, რომ ადრე თუ გვიან ევროკავშირი საკუთარი შეცდომებიდან გამომდინარე, გადატვირთავს ამ ურთიერთობებს, ყოველ შემთხვევაში, საზოგადოება რასაც ხედავს, ეს არის აქ მთავარი - ჩვენი მხრივ, საქართველოს წილი პასუხისმგებლობა რაც არის, აქ ჩვენ პირნათელი ვართ მოსახლეობის, თავად ევროკავშირის და ევროკავშირის წევრი ქვეყნების წინაშეც. ჩვენ არ ვყოფილვართ ის, რომელმაც დააზიანა ეს ურთიერთობები და ჩვენ მზად ვართ ამ ურთიერთობების გადატვირთვისთვის, ოღონდ, რა თქმა უნდა, სამართლიანობისა და თანასწორობის პრინციპით“, - აღნიშნა ლევან მახაშვილმა.