ლევან მახაშვილი: საქართველო აღმოჩნდა თავდასხმის ობიექტი უკრაინაში ომის დაწყების შემდგომ. იყო ცალსახა ინტერესები, რომ ქვეყანას აერჩია მხარე და ქვეყანამ არ აირჩია მხარე. ბიძინა ივანიშვილის და მისი ოჯახის თავგანწირვის ხარჯზე ამ ქვეყანამ ბეწვის ხიდზე გაიარა

საქართველო აღმოჩნდა თავდასხმის ობიექტი უკრაინაში ომის დაწყების შემდგომ. იყო ცალსახა ინტერესები, რომ ქვეყანას აერჩია მხარე და ქვეყანამ არ აირჩია მხარე, - განაცხადა გადაცემაში „ღია ეთერი - დებატები“ პარლამენტის ევროპასთან ინტეგრაციის კომიტეტის თავმჯდომარე ლევან მახაშვილმა.

მისივე თქმით, ბიძინა ივანიშვილის და მისი ოჯახის თავგანწირვის ხარჯზე ამ ქვეყანამ ბეწვის ხიდზე გაიარა.

„ჩვენი მთავარი მიზანი სწორედ ის არის, რომ ამ ქვეყანას სცემდნენ პატივს. ევროკავშირი არ განისაზღვრება მარტო გეოგრაფიით, ევროკავშირი იყო თანასწორობა, სამართლიანობა, სუვერენიტეტის დაცვა და პატივისცემა. ამას რაც მალე მიუბრუნდება ევროკავშირის ზოგიერთი წევრი სახელმწიფო, რაც უფრო მალე გაიხსენებს საკუთარ წარსულს, მათთვისაც კარგი იქნება და ჩვენთვისაც. საქართველო ასეთ შემთხვევაში იქნება ძლიერი პარტნიორი, როგორც ევროპისთვის, ასევე ამერიკისთვის.

საქართველო არავისი პრობლემა არ არის, არავისი მოსაგვარებელი საქართველოს და ქართველ ხალხს არაფერი არ სჭირს, ჩვენ ჩვენს საქმეს ვაკეთებთ, ჩვენ ბუნებრივად ვაკეთებთ იმას, რაც არის საჭირო ევროპულ ოჯახში ყოფნისთვის. სამწუხაროდ, ორმაგი სტანდარტების მსხვერპლი ვართ, თუმცა ეს არ ნიშნავს, რომ ჩვენ თავს დავხრით და მსხვერპლის როლიდან დავიწყებთ ყურებას. ჩვენ ჩვენს საქმეს გავაკეთებთ და დარწმუნებული ვარ, რომ ადრე თუ გვიან ჩვენ გვექნება შესაძლებლობა, რომ მოლაპარაკების მაგიდაზე კვლავ დავსხდეთ. არის ამის ძალიან ბევრი ნიშანი, შემოთვლები და ა.შ. ომიც ადრე თუ გვიან იმედია, დასრულდება და ჩვენ აღვადგენთ ნორმალურ ურთიერთობებს, ისეთს, როგორსაც იმსახურებს საქართველო“, - აღნიშნა ლევან მახაშვილმა.