ლევან მეხუზლა: ალკოჰოლიანი სასმელების რეალიზაციისთვის სერტიფიკატის გაცემის გადასახადზე: მხოლოდ 10 ლარზეა საუბარი ადგილობრივ ბაზარს თუ ვგულისხმობთ. სერტიფიცირების პროცესის უკან დგას ძალიან დიდი შრომა და დანახარჯები

მხოლოდ 10 ლარზეა საუბარი ადგილობრივ ბაზარს თუ ვგულისხმობთ. მცირე მარნებისთვის განახევრებულია გადასახადი, - განაცხადა „დღის ქრონიკასთან“ ღვინის ეროვნული სააგენტოს თავმჯდომარემ, ლევან მეხუზლამ სასმელების რეალიზაციისთვის სერტიფიკატის ფასზე საუბრისას.

მისი თქმით, თანხა, რომელიც განისაზღვრა მოხმარდება იმ ხარჯებს, რომელიც სერტიფიკატის გაცემისას იხარჯება.

„ზოგადად სერტიფიცირება 2023 წლიდან არის სავალდებულო ადგილობრივ ბაზარზე. მანამდე 2017 წლიდან იყო ექსპორტის სერტიფიცირება სავალდებულო. ძალიან ბევრ ქვეყანა, სადაც ქართული ღვინის ექსპორტი ხორციელდება ითხოვს სავალდებულო სერტიფიკატს.

რაც შეეხება გადასახადს, ყველანაირი სახელმწიფო სერვისი, მაგალითად, პირადობის მოწმობა, პასპორტი და ა.შ. არის ფასიანი. ამ სერტიფიცირების პროცესის უკან დგას ძალიან დიდი შრომა და დანახარჯები.

მხოლოდ 10 ლარზეა საუბარი ადგილობრივ ბაზარს თუ ვგულისხმობთ. აქვე დავაზუსტებ, რომ ექსპორტის სერტიფიცირება ვახსენე და მცირე მარნებისთვის განახევრებულია გადასახადი მსხვილი მარნების ხარჯზე. ასე, რომ ვფიქრობ, რომ ეს ფასიდან გამომდინარე და იქიდან გამომდინარე, რომ ჩვენი სერტიფიცირების პროცესი არის მიბმული ლოტზე და არა თითოეულ პარტიაზე და შეუძლიათ ლოტს გაატარონ მეწარმეებმა პროცედურები შესაბამისი, რომელიც ბევრად გაუადვილებს და გაუიაფებს შემდგომში სერტიფიკატის აღებას, ვფიქრობ, რომ არანაირი დამატებითი ზეწოლა არ იქნება დარგზე“, - განაცხადა ლევან მეხუზლამ.

ცნობისთვის, პირველი სექტემბრიდან ადგილობრივ ბაზარზე ალკოჰოლიანი სასმელების რეალიზაციისთვის სერტიფიკატის გაცემა ფასიანი გახდა და ერთ განაცხადზე 10 ლარია.