ლონდონში ყველაზე გრძელი ტირამისუ მოამზადეს🧑‍🍳

ლონდონში მსოფლიოში ყველაზე დიდი ტირამისუ მოამზადეს. დესერტის სიგრძემ 440 მეტრი შეადგინა.

დესერტზე 100 იტალიელი შეფ-მზარეული 2 დღის განმავლობაში მუშაობდა. გიგანტური ტირამისუს მოსამზადებლად დაიხარჯა 19 ათასი კვერცხი, 2,2 ტონა მასკარპონე და 128 ათასი ორცხობილა „სავოიარდი“.

გინესის რეკორდების წიგნის წესების თანახმად, დესერტი უშუალოდ ადგილზევე უნდა დამზადებულიყო და აწყობილიყო. ეს გრანდიოზული დესერტი მეფესა და სამეფო ოჯახს მიეძღვნა, რის გამოც ზემოდან ოქროს გვირგვინით მორთეს.

დესერტის მომზადება კონდიტერ მირკო რიჩის იდეა იყო. ის ამ რეკორდს ადრეც ფლობდა: 2017 წელს რიჩიმ ყველაზე გრძელი ტირამისუ იტალიაში მოამზადა, თუმცა 2019 წელს სხვა იტალიურმა გუნდმა შედეგის გაუმჯობესება შეძლო. მაშინ მილანში 273 მეტრის სიგრძის ტირამისუ მოამზადეს. ახლა რეკორდი ისევ რიჩის დაუბრუნდა. კონდიტერმა ტირამისუს ერთ-ერთი ყველაზე შთამბეჭდავი დესერტი უწოდა, რომელიც კი ოდესმე იტალიაში შექმნილა.