მაკა ბოჭორიშვილი: არანაირი შეზღუდვები დაფინანსების გამოყოფასთან დაკავშირებით ევროკავშირს არ აქვს. ეს მათი მხრიდან მიღებული გადაწყვეტილებაა, რომელიც ასევე ინსტრუმენტად იყო გამოყენებული საქართველოსთან ურთიერთობებში

„არანაირი შეზღუდვები დაფინანსების გამოყოფასთან დაკავშირებით ევროკავშირს არ აქვს. ეს მათი მხრიდან მიღებული გადაწყვეტილებაა, რომელიც ასევე ინსტრუმენტად იყო გამოყენებული საქართველოსთან ურთიერთობებში“, - განუცხადა სომხეთში ქართველ ჟურნალისტებს საქართველოს საგარეო საქმეთა მინისტრმა მაკა ბოჭორიშვილმა კაია კალასის პასუხად.

ბოჭორიშვილის თქმით, ერთი ის, რომ წესებისა და კანონის მიხედვით უნდა იყოს ნაბიჯები გადადგმული.

„არანაირი შეზღუდვები დაფინანსების გამოყოფასთან დაკავშირებით ევროკავშირს არ აქვს. ეს მათი მხრიდან მიღებული გადაწყვეტილებაა, რომელიც ასევე ინსტრუმენტად იყო გამოყენებული საქართველოსთან ურთიერთობებში. ჩვენ ძალიან კარგად გვახსოვს, როგორ კეთდებოდა განცხადებები ამა თუ იმ პროგრამის შეჩერების თაობაზე ევროკავშირის ბიუროკრატიის მხრიდან, რასაც შემდგომ იყენებდნენ იმისთვის, რომ ქვეყნის შიგნით შექმნილიყო პოლიტიკური დღის წესრიგი და გვქონოდა გარკვეული გამოხმაურება. ამისთვის იყო გამოყენებული ბრიუსელის ბიუროკრატიის მხრიდან ხშირად პროგრამები და სხვადასხვა დაფინანსების საკითხები. საქართველოს მხრიდან არანაირ დაფინანსებას პრობლემა არ შეჰქმნია. ერთი ის, რომ წესებისა და კანონის მიხედვით უნდა იყოს ნაბიჯები გადადგმული, ამაში უცნაური არაფერია. კანონები მიღებულია საქართველოს ინტერესებიდან გამომდინარე და თუ ვინმეს აინტერესებს თუ რა ინტერესებიდან გამომდინარეა ესა თუ ის კანონი მიღებული, ყველას აქვს შესაძლებლობა, ჩვენ არასდროს გვითქვამს დიალოგზე უარი, არასდროს გვითქვამს ახსნაზე უარი და თუ ვინმეს სურს ჩაიხედოს სიღრმეებში, ამის შესაძლებლობაც არსებობს“, - აღნიშნა მან.

მაკა ბოჭორიშვილის თქმითვე, საზოგადოებამ ძალიან კარგად იცის, თუ რატომ მოხდა და რატომ ხდება ამა თუ იმ კანონის მიღება.

„რა თქმა უნდა, ჩვენ არასდროს დაგვიშურებია ჩვენი ახსნა და ჩვენმა საზოგადოებამ ძალიან კარგად იცის, თუ რატომ მოხდა და რატომ ხდება ამა თუ იმ კანონის მიღება. ეს არის ძალიან კარგად ახსნილი. ეს, პირველ რიგში, გამომდინარეობს ჩვენი ქვეყნის, ჩვენი საზოგადოების ინტერესებიდან და მიმართულია ჩვენს ქვეყანაში სწორედ დემოკრატიული წესრიგისა და სტაბილურობის დასაცავად. კიდევ ერთხელ, თუ ვინმეს სურს დამატებითი ინფორმაციის მიღება, თუ რას ემსახურება კანონები, რა თქმა უნდა, მათ აქვთ ამის შესაძლებლობა. თუკი ექნებათ სურვილები, კიდევ ერთხელ, ჩვენ ყოველთვის მზად ვართ დიალოგისთვის და მივაწოდოთ ის ახსნა-განმარტებები, რაც მათ ესაჭიროებათ იმისთვის, რომ ასეთი რიტორიკა აღარ ვიხილოთ ევროკავშირის მხრიდან“, - განაცხადა მაკა ბოჭორიშვილმა.