მედვედევი: რუსეთი დაინტერესებულია უკრაინის კონფლიქტის რაც შეიძლება მალე დასრულებით, თუმცა მხოლოდ საკუთარი პირობებით - წინააღმდეგ შემთხვევაში, ის სწრაფად განახლდება

რუსეთი დაინტერესებულია უკრაინის კონფლიქტის რაც შეიძლება მალე დასრულებით, თუმცა მხოლოდ საკუთარი პირობებით - წინააღმდეგ შემთხვევაში, ის სწრაფად განახლდება. ამის შესახებ რუსეთის უშიშროების საბჭოს თავმჯდომარის მოადგილემ, დიმიტრი მედვედევმა გამოცემა „ვედომოსტისთვის“ მიცემულ ინტერვიუში განაცხადა.

„რა თქმა უნდა, ყველანი დაინტერესებულნი ვართ, რომ კონფლიქტი რაც შეიძლება მალე დასრულდეს. ამასთან, ის აუცილებლად ჩვენი პირობებით უნდა დასრულდეს, რათა თავიდან ავიცილოთ მისი განმეორება მომავალში ან მსოფლიო ომში გადაზრდა. არსებობს თუ არა ასეთი ალბათობა [მსოფლიო ომში გადაზრდის]? სამწუხაროდ, არსებობს. თუ რაიმე მიზეზით კონფლიქტის ჩვენი პირობებით დასრულებას არ მივაღწევთ, ის მოკლე ინტერვალებით კვლავ იჩენს თავს, ვინაიდან ჩვენი არაკეთილმოსურნეები კვლავ შეეცდებიან ჩვენი ქვეყნის საფუძვლების შერყევას და პირველივე შესაძლებლობისთანავე ეცდებიან მის დაშლას“, - აღნიშნა მან.