მიხეილ სარჯველაძე გლობალური ფონდის რეგიონული პროგრამების დირექტორ დუმიტრუ ლატიჩევსკის შეხვდა

ჯანდაცვის მინისტრი გლობალური ფონდის აღმოსავლეთ ევროპისა და ცენტრალური აზიის რეგიონის პროგრამების დირექტორს შეხვდა, - ინფორმაციას ჯანდაცვის სამინისტრო ავრცელებს.

უწყების ცნობით, მიხეილ სარჯველაძემ და დუმიტრუ ლატიჩევსკიმ მიმდინარე თანამშრომლობის ფარგლებში მიღწეული შედეგები შეაჯამეს.

„მხარეებმა განიხილეს ჯანდაცვის სფეროში მიმდინარე რეფორმები და იმსჯელეს შიდსის, ტუბერკულოზისა და ჰეპატიტების სამკურნალო სახელმწიფო პროგრამებზე. საუბარი შეეხო საქართველოს, როგორც მალარიისგან თავისუფალ ქვეყანას და მალარიის ელიმინაციის სერტიფიკატის მინიჭების საკითხსაც.

მხარეებმა საქართველოსა და გლობალურ ფონდს შორის სამომავლოდ კიდევ უფრო აქტიური თანამშრომლობის პერსპექტივებიც განიხილეს.

შეხვედრას ასევე ესწრებოდნენ დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ირაკლი ფურცელაძე და გლობალური ფონდის აღმოსავლეთ ევროპისა და ცენტრალური აზიის რეგიონის გუნდის წარმომადგენელი ოლგა გრიდერი“, - აღნიშნულია გავრცელებულ ინფორმაციაში.