მსოფლიო ოკეანის ზედაპირის დღე-ღამის საშუალო ტემპერატურის ახალი რეკორდი დაფიქსირდა

22 აგვისტოს მსოფლიო ოკეანის ზედაპირის დღე-ღამის საშუალო ტემპერატურამ 21,1 გრადუსს მიაღწია, რითაც 2024 წლის მარტში დაფიქსირებულ რეკორდს - 21,09 გრადუსს გადააჭარბა.

კლიმატის ცვლილების ევროპული სამსახურის, Copernicus-ის ცნობით, ახალი რეკორდი აგვისტოში დაფიქსირდა, თუმცა, როგორც წესი, ოკეანის ზედაპირის ტემპერატურა მაქსიმალურ ნიშნულს მარტსა და აპრილში აღწევს, როდესაც სამხრეთ ნახევარსფეროში ზაფხულის სეზონი სრულდება. 22 აგვისტოს მაჩვენებელი ასევე წინა აგვისტოს რეკორდზე - 20,98 გრადუსზე მაღალი აღმოჩნდა, რომელიც 2023 წელს დაფიქსირდა.

Copernicus-ში აღნიშნეს, რომ ახალი მაქსიმუმი იმ რეკორდული და რეკორდთან მიახლოებული ყოველთვიური მაჩვენებლების სერიის ნაწილი გახდა, რომლებიც 2026 წელს ფიქსირდება.

სამსახურში ტემპერატურის მატება მსოფლიო ოკეანის გრძელვადიან დათბობასა და წყნარი ოკეანის ტროპიკულ ნაწილში „ელ-ნინიოს“ გაძლიერებას დაუკავშირეს. მსოფლიო მეტეოროლოგიური ორგანიზაციის მონაცემებით, უახლოეს თვეებში ეს მოვლენა გაძლიერებას გააგრძელებს. პროგნოზების თანახმად, მისმა ინტენსივობამ შესაძლოა ისეთ დონეს მიაღწიოს, როგორიც რამდენიმე ათწლეულის განმავლობაში არ დაფიქსირებულა.