ნაძალადევის რაიონში, ზესტაფონის ქუჩაზე სკვერის რეაბილიტაცია მიმდინარეობს

ნაძალადევის რაიონის გამგეობამ , ზესტაფონის ქუჩის N18-თან მდებარე სკვერის კაპიტალური რეაბილიტაცია დაიწყო. ინფორმაციას თბილისის მერია ავრცელებს.

პირველ ეტაპზე, ტერიტორია გასუფთავდა ქაოსური და უკანონო შემოღობვებისაგან, განხორციელდა ლითონის კონსტრუქციების და მოძველებული ბეტონის საძირკვლების დემონტაჟი.

პროექტის მიხედვით, 1 200 კვ.მ ფართობზე ინფრასტრუქტურული და გამწვანების სამუშაოები შესრულდება. დამონტაჟდება საბავშვო-გასართობი ატრაქციონები, ტრენაჟორები და ვიდეომონიტორინგის კამერები; მოეწყობა სარწყავი სისტემა, გარე განათების ქსელი, მოსასვენებელი სივრცეები, ასევე, გაკეთდება ახალი საფეხმავლო ბილიკები და დაირგვება სხვადასხვა სახეობის ხე-მცენარეები.

სკვერის კეთილმოწყობისთვის ადგილობრივ ბიუჯეტში 540 000 ლარია გათვალისწინებული.

მიმდინარე სამუშაოებს ნაძალადევის რაიონის გამგებელი ირაკლი ანდღულაძე, პარლამენტის დელეგატი ირაკლი ხელაძე და საკრებულოს მაჟორიტარი შალვა მაისურაძე , ადგილობრივ მოსახლეობასთან ერთად გაეცნენ.