ნიკოლოზ მეტრეველი: წლების განმავლობაში ნიკა გვარამია და სხვები ებრძოდნენ ქართულ ეკლესიას. ეს ძალები კვლავ ცდილობენ, ეს გააკეთონ. როდესაც სცდება საკითხი სასულიერო არჩევნებს, თითოეული მოქალაქე ვალდებულია, სიმართლის მხარეს დადგეს

როდესაც სცდება საკითხი სასულიერო არჩევნებს, თითოეული მოქალაქე ვალდებულია, სიმართლის მხარეს დადგეს, - განაცხადა პრესკონფერენციაზე ანალიტიკოსმა, ნიკოლოზ მეტრეველმა საქართველოს მართლმადიდებელი ეკლესიის ახალი პატრიარქის არჩევის საკითხზე საუბრისას.

იგი ემიჯნება ნებისმიერი მხრიდან ამ პროცესში ჩარევას. ამასთან, მეტრეველმა ისაუბრა შიდა და გარე ძალებზე, რომლებსაც სურთ, ამ პროცესში შფოთის შეტანა.

„ეს არის სასულიერო ხელისუფლების არჩევნები და მე ცალსახად ვემიჯნები ნებისმიერ ჩარევას, ნებისმიერი მხრიდან. თუმცა, აქვე არ შემიძლია არ გამოვეხმაურო იმ დესტრუქციულ, მავნებლურ და ბოროტ ძალებს, რომლებიც სხვადასხვა მხრიდან ერევიან საპატრიარქოს საქმეებში. არის შიგნიდანაც ამის მცდელობები და გარედანაც. მაგალითად, ადამიანები, რომელთაც აქვთ მღვდელმოქმედება შეჩერებული ან თუნდაც ფსევდო ექსპერტები და სამწუხაროდ, რამდენიმე მეუფეც ერევა საქმეში.

ეს არის ძალიან ნათელი. ერთ მხარეს არის სიკეთე, სინათლე და მეორე მხარეს არიან ბოროტი ძალები. გასაგებია, ამ ძალების უკან ვინც დგას. ჩვენ ვიცით ეს, ქვეყნის შიგნით არის რადიკალური ოპოზიცია და ქვეყნის გარეთ არის „დიფ სთეითი“, რომელიც როგორც საერო ხელისუფლებაში ცდილობს შფოთის შეტანას და არეულობას და ჩვენ ვნახეთ, მათ შორის, აგენტების მხილება. წლების განმავლობაში ნიკა გვარამია და სხვები დაუნდობლად ებრძოდნენ ქართულ ეკლესიას. ეს ძალები დღესაც, კვლავაც ცდილობენ, რომ ეს გააკეთონ.

როდესაც სცდება ეს საკითხი სასულიერო არჩევნებს, ჩვენ ვალდებული ვართ და თითოეული მოქალაქე ვალდებულია, სიმართლის მხარეს დადგეს“, - განაცხადა მეტრეველმა.

საქართველოს მართლმადიდებელი ეკლესიის 142-ე პატრიარქს 11 მაისს, მე-14 საეკლესიო კრებაზე აირჩევენ.