ნიკოლოზ სამხარაძე გაერთიანებული სამეფოს საგარეო, თანამეგობრობისა და განვითარების სამინისტროს წარმომადგენელს შეხვდა

საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე გაერთიანებული სამეფოს საგარეო, თანამეგობრობისა და განვითარების სამინისტროს ცენტრალური აზიისა და აღმოსავლეთ სამეზობლოს საკითხებში დირექტორის მოადგილეს, მარკ კლეიტონს შეხვდა.

შეხვედრაზე მხარეებმა საქართველოსა და გაერთიანებული სამეფოს ორმხრივი ურთიერთობები და თანამშრომლობის შემდგომი გაღრმავების პერსპექტივები განიხილეს.

ნიკოლოზ სამხარაძემ რუსეთის მიერ საქართველოს რეგიონების ოკუპაციის შედეგად შექმნილ ვითარებასა და გამოწვევებზე, ასევე საქართველოს სუვერენიტეტისა და ტერიტორიული მთლიანობის მიმართ საერთაშორისო მხარდაჭერის მნიშვნელობაზე გაამახვილა ყურადღება.

შეხვედრის ერთ-ერთი მთავარი თემა იყო რეგიონული უსაფრთხოების გარემო. მხარეებმა უკრაინაში მიმდინარე ომის გავლენაზე, სამხრეთ კავკასიაში არსებულ ვითარებასა და რეგიონში მიმდინარე პროცესებზე იმსჯელეს.

შეხვედრისას ასევე იმსჯელეს შუა დერეფნის პროექტზე და მის სტრატეგიულ მნიშვნელობას გაუსვეს ხაზი.

შეხვედრაში მონაწილეობდა გარეტ უორდი, დიდი ბრიტანეთის ელჩი საქართველოში.