ნინო წილოსანი: ნამახვანჰესის კრიტიკული საჭიროების და მნიშვნელობის მიუხედავად, სამწუხაროდ, იმ მომენტში სახელმწიფომ ვერ შეძლო ამ პროექტის დაცვა. ეს კიდევ ერთხელ გვაჩვენებს, თუ რამდენად სუსტი იყო ქართული სახელმწიფო გარე ჩარევებისა და იმ დაფინანსებული პოლიტიკის მიმართ, რომელიც ამ ქვეყანაში მიმდინარეობდა

ნამახვან ჰესის კრიტიკული საჭიროების და მნიშვნელობის მიუხედავად, სამწუხაროდ იმ მომენტში სახელმწიფომ ვერ შეძლო ამ პროექტის დაცვა, - განაცხადა საქართველოს პარლამენტის ვიცე-სპიკერმა ნინო წილოსანმა, რომელიც გამოეხმაურა ცალკეული ტელევიზიების მიერ გავრცელებულ ინფორმაციას, თითქოს ამერიკის შეერთებული შტატების სასამართლომ საქართველოს მთავრობას დააკისრა კომპანია „ენკას“ სასარგებლოდ 400 მილიონი აშშ დოლარის გადახდის ვალდებულება „ნამახვანჰესთან“ დაკავშირებულ საქმეზე.

მისივე თქმით, ეს კიდევ ერთხელ გვაჩვენებს, თუ რამდენად სუსტი იყო ქართული სახელმწიფო გარე ჩარევების და იმ დაფინანსებული პოლიტიკის მიმართ, რომელსაც ამ ქვეყანაში ატარებდნენ.

„მას შემდეგ ჩვენ ბევრი რამ შევცვალეთ, შევცვალეთ და გავიბრძოლეთ იმ გარედან წამოსული დაკვეთების წინააღმდეგ. ამ ქვეყნის სუვერენიტეტი არამხოლოდ მისი პოლიტიკური დაცულობა, არამედ ზუსტად ისეთი მნიშვნელოვანი ეკონომიკური პროექტების დაცვაა, როგორიც არის თავის დროზე ნამახვანჰესი, ხოლო ახლა „იგლ ჰილსი“, რომლის წინააღმდეგაც ზუსტად იგივე ჯგუფები ილაშქრებენ და აგორებენ ნეგატიურ კამპანიებს“, - აღნიშნა ნინო წილოსანმა.

ცნობისთვის, იუსტიციის მინისტრის მოადგილემ ბექა ძამაშვილმა განმარტა, რომ ვაშინგტონის სასამართლოში არანაირი პროცესი არ მიმდინარეობს, რომელიც არსებითად მსჯელობს ამ საკითხზე და საქმე შეეხება საზოგადოებისთვის კარგად ცნობილ საარბიტრაჟო გადაწყვეტილებას, რომელიც ორი წლის წინ, 2024 წელს მიიღო პარიზის არბიტრაჟმა და შესაბამისად, საქართველოს ხელისუფლებას ეს გადაწყვეტილება გასაჩივრებული აქვს პარიზის სააპელაციო სასამართლოში.