ოთარ ჭულუხაძე: ფაქტობრივად, უკვე შევეჩვიეთ ევროკავშირის მხრიდან საქართველოს სახელმწიფოს მიმართ, რბილად რომ ვთქვათ, არამეგობრულ და ძალიან დემაგოგიურ რეზოლუციებს, შეფასებებს

ფაქტობრივად, უკვე შევეჩვიეთ ევროკავშირის მხრიდან საქართველოს სახელმწიფოს მიმართ რბილად რომ ვთქვათ, არამეგობრულ და ძალიან დემაგოგიურ რეზოლუციებს, შეფასებებს, - განაცხადა გადაცემაში „დღის ქრონიკა“ ანალიტიკოსმა ოთარ ჭულუხაძემ.

მისი თქმით, საზოგადოების მეტმა ნაწილმა გაიგო, რომ ევროკავშირი არ არის სამოთხე, სადაც ჩვენ გაშლილი ხელით გველოდებიან.

„ფაქტობრივად, უკვე შევეჩვიეთ ევროკავშირის მხრიდან საქართველოს სახელმწიფოს მიმართ, რბილად რომ ვთქვათ, არამეგობრულ და ძალიან დემაგოგიურ რეზოლუციებს, შეფასებებს. ეს არის მორიგი ნაბიჯი ამ მიმართულებით. მარტა კოსმა იცის, როგორც მან თქვა, რომ საქართველო და მთლიანად კავკასია არის მშვიდობის ალტერნატივა, ერთგვარად მშვიდობის კუნძული და მათთვის საქართველო არის მნიშვნელოვანი, საჭირო ქვეყანა, მაგრამ მეორე მხრივ ისინი აგრძელებენ მათრახისა და თაფლაკვერის პოლიტიკას. ერთი მხრივ ისინი საუბრობენ, რომ კი, საქართველოს მნიშვნელობა აქვს, ქართველმა ხალხმა ეს დაიმსახურა, გეგონება ხელისუფლებას ხალხი არ ირჩევდეს, მაგრამ მეორე მხრივ გრძელდება თავიანთი სასურველი აქტორებისთვის წყლის დასხმა, რომ აბა, ეგებ თქვენც აიტაცოთ ჩვენი რეზოლუციები და შემდეგ თარგმნოთ პოლიტიკურ აქტივობად, პროტესტად თუ სხვა. თუმცა, როგორც ვხედავთ აქაურ, ადგილობრივ ველზე აქტორები არიან ძალიან ცუდ ფორმაში. მათი ეს განცხადებებიც მორიგი ჟესტია არამეგობრულობის, ქედმაღლობის და ნეოკოლონიალური მიდგომის ჩვენი ქვეყნის მიმართ. ამას თანდათანობით უფრო ნაკლები რეზონანსი მოჰყვება, რადგან საზოგადოების მეტმა ნაწილმა გაიგო, რომ ევროკავშირი არ არის სამოთხე, სადაც ჩვენ გაშლილი ხელით გველოდებიან“, - აღნიშნა მან.