პეტრე მამრაძე გერმანიის საგარეო საქმეთა სამინისტროზე: დღემდე საიტზე ვერ გამოასწორეს ინფორმაცია საქართველოზე, ხარვეზი არისო. რომელ ქვეყანაში ხდება, რომ გადის თვეები და ხარვეზს ვერ ასწორებენ კომპიუტერულ სისტემაში

ქვეყნებს შორის ურთიერთობების გაუმჯობესებაში არსებითი წვლილის შეტანა შეუძლია ელჩს. თუ გამოგზავნიან ელჩს, რომელსაც პატივს სცემენ სტრუქტურაში - საგარეო საქმეთა სამინისტროში, ის ჩამოვა, გაეცნობა ვითარებას და მიაწვდის სწორ ინფორმაციას, რომ არც ერთი მტკიცებულება 2024 წლის არჩევნების გაყალბებისა დღემდე არ არსებობს და ა.შ. - თუ ელჩი ამ პოზიციაზე იქნება, არ არის ის ვითარება, რომ გაიწვიონ ასეთი ელჩი, - განაცხადა გადაცემაში „EURO ანატომია“ „ერთიანი ნეიტრალური საქართველოს“ წევრმა პეტრე მამრაძემ კითხვის საპასუხოდ, არსებობს თუ არა ახალი ელჩის პირობებში საქართველოსა და გერმანიას შორის ურთიერთობების გაუმჯობესების შესაძლებლობა.

მისივე თქმით, პეტერ ფიშერი პირიქით, სულ სხვა ინფორმაციას აგზავნიდა - როგორც „ნაცმოძრაობის“ წევრი.

პეტრე მამრაძემ ასევე შეაფასა ის ფაქტი, რომ გერმანიაში საქართველოს ელჩი ვერ ახერხებს, რომ რწმუნებები ჩააბაროს შესაბამის უწყებას.

„ეს არის დიდი სკანდალი, უპრეცედენტო რამ, თან ალეკო კარტოზიას გერმანიაში კარგი მხრიდან იცნობენ. ასოცირებულია იმ დროსთან, როდესაც კარგი ურთიერთობა იყო ქვეყნებს შორის. მისთვის გერმანული ენა არის მეორე მშობლიური ენა, რაც ძალიან კარგად მოქმედებს. აი, ამას აჩერებენ, სამაგიეროდ დღემდე საიტზე ვერ გამოასწორეს ინფორმაცია საქართველოზე, ხარვეზი არისო. რომელ ქვეყანაში ხდება, რომ გადის თვეები და ხარვეზს ვერ ასწორებენ კომპიუტერულ სისტემაში“, - აღნიშნა პეტრე მამრაძემ.

უკვე მერვე თვეა, ოფიციალური ბერლინი საქართველოს ელჩისგან რწმუნებათა სიგელს არ იბარებს. გერმანიის საგარეო საქმეთა სამინისტრო ოფიციალურ ვებგვერდზე არ აახლებს საქართველოს ხელისუფლების შესახებ ოფიციალურ მონაცემებსაც. აღნიშნულ საკითხებზე საქართველოს საგარეო საქმეთა სამინისტროს გერმანული მხარისგან განმარტება არ მიუღია.