პეტრე მამრაძე პეტერ ფიშერზე: არაერთხელ მომისმენია მოქალაქეებისგან, რატომ ითმენს ხელისუფლება ასეთ ელჩს და რატომ არ გააძევებს, ყველას ვუხსნიდი, რომ საქართველოს ეს სკანდალი არ უღირს. ხალხში არის მოლოდინი, რომ ეს ურთიერთობები გამოსწორდება

„ერთიანი ნეიტრალური საქართველოს“ წევრის, პეტრე მამრაძის განცხადებით, გერმანიის ელჩი პეტერ ფიშერი საქართველოდან თავის ქვეყანაში აგზავნის ისეთ ინფორმაციას, რომელიც იქ მოეწონებათ და ამდენად, საქართველოზე სიმართლის თქმით იგი განწყობას არავის გაუფუჭებს.

„მაგალითად, იმის თქმით, რასაც წინა ელჩი ამბობდა, რომ არ არის გაყალბებული არჩევნები და ასე შემდეგ. აქ კი [ფიშერის შემთხვევაში] პირიქით, აგზავნიდა იმას, რაც იქ უხაროდათ და შესაბამისად, სრული სიმბიოზი იყო“, - განაცხადა მამრაძემ გადაცემაში „EURO ანატომია“ პეტერ ფიშერზე საუბრისას.

მან ასევე ისაუბრა, რამდენად უწყობს ხელს გერმანიის ელჩის ასეთი ქმედებები საქართველოს მოქალაქეებში გერმანიის მიმართ ნეგატიური განწყობების ჩამოყალიბებას.

მამრაძის თქმით, ძალიან ბევრმა ადამიანმა ეკითხება მას, რატომ ითმენს ხელისუფლება ასეთ ელჩს და რატომ არ გააძევებს მას საქართველოდან.

„ყველას ვუხსნიდი, რომ საქართველოს ეს სკანდალი არ უღირს, ილაპარაკოს, რაც უნდა, ოღონდ უნდა ვუპასუხოთ სიმართლე. შესაბამისად, ეს განწყობები არის. მაგრამ, მე მახსოვს განწყობები გერმანიის საგარეო საქმეთ მინისტრის, ანალენა ბერბოკის მიმართ - „ამ ქალს არ უნდა დანახვა, რაც ხდება საქართველოში?!“ ისმენდნენ მის გამონათქვამებს ტელევიზიით - „როგორ იბრძვის ქართველი ხალხი ევროპული გზისთვის“ - ამ ძალადობით, პოლიციის დაწვით და ასე შემდეგ. ასე, რომ ეს ნეგატიური განწყობები ჩამოყალიბდა“, - აღნიშნა მამრაძემ.

მისივე თქმით, საქართველოს გერმანიასთან განსაკუთრებული ურთიერთობა აქვს , პირველი რესპუბლიკიდან დაწყებული, როცა 1918 წლის 26 მაისს საქართველოს დამოუკიდებლობა სწორედ გერმანიის ინიციატივით გამოცხადდა. მისი თქმით, არის მოლოდინი, რომ ეს ურთიერთობები გამოსწორდება.