პოდოლიაკი: უკრაინამ რუსეთს ზავის სხვადასხვა ვარიანტი შესთავაზა, თუმცა მოსკოვი ამისთვის მზად არ არის

უკრაინამ რუსეთს ზავის სხვადასხვა ვარიანტი შესთავაზა, თუმცა მოსკოვი ამისთვის მზად არ არის. ამის შესახებ უკრაინის პრეზიდენტის ოფისის ხელმძღვანელის მრჩეველმა, მიხაილო პოდოლიაკმა განაცხადა.

„ჩვენ ნებისმიერ ფორმატს ვთავაზობთ: ზავს საჰაერო სივრცეში და ენერგეტიკულ ზავსაც. მთელი რიგი ფორმატების მოძიებაა შესაძლებელი. გარდა ამისა, ფრონტის ხაზზე საომარი მოქმედებების გაყინვა იმისთვის, რომ შემდეგ უკვე რთული მოლაპარაკებები წარიმართოს“, - აღნიშნა პოდოლიაკმა.

მან ასევე ხაზგასმით აღნიშნა, რომ პრეზიდენტი ვოლოდიმირ ზელენსკი მზადაა პუტინთან შეხვედრისთვის.

„უკრაინის პრეზიდენტმა არაერთხელ თქვა, რომ მზადაა პირისპირ შეხვედრისთვისაც რთული საკითხების განსახილველად და ა. შ. აშშ ამ ყველაფერს მთლიანად მხარს უჭერს“, - აღნიშნა მრჩეველმა.

ამავდროულად, პოდოლიაკის თქმით, პუტინი მზად არ არის უკრაინაში ომის შესახებ მოლაპარაკებებისთვის.