POLITICO: ევროპას საკუთარი მრეწველობის გადარჩენა სურს, მაგრამ ჯერ ვერ შეთანხმებულა, როგორ მოახერხოს ეს
ევროკავშირი საკუთარი ინდუსტრიის დაცვის გზებს ეძებს, თუმცა წევრ ქვეყნებსა და ევროპარლამენტს შორის ერთიანი პოზიცია ამ დრომდე ვერ ყალიბდება. ინფორმაციას POLITICO ავრცელებს.
გამოცემის ცნობით, ევროკავშირში კრიზისის სიმბოლოდ განიხილება გერმანული ავტომწარმოებლის Volkswagen-ის გეგმა, რომელიც 100 ათასამდე სამუშაო ადგილის შემცირებასა და გერმანიაში ოთხი ქარხნის დახურვას ითვალისწინებს. ბრიუსელი სწორედ ასეთ ინდუსტრიულ გამოწვევებს ასახელებს იმ პრობლემად, რომლის თავიდან აცილებასაც ახალი პოლიტიკით ცდილობს.
ევროკავშირის ქვეყნები და კანონმდებლები ამჟამად მსჯელობენ, როგორ უნდა უპასუხონ არსებულ ვითარებას. წლის ბოლომდე ევროპელი ლიდერები გეგმავენ ე.წ. „მრეწველობის აჩქარების აქტის“ გარშემო შეთანხმებას, რომელიც სახელმწიფო შესყიდვების სექტორში ევროპულ კომპანიებთან მილიარდობით ევროს ღირებულების კონტრაქტების გაფორმებას ითვალისწინებს. მიზანი - ჩინეთიდან იაფი იმპორტის ზრდით გამოწვეულ ზეწოლასთან გამკლავებაა.
ევროკომისარმა მრეწველობის საკითხებში სტეფან სეჟურნე განაცხადა, რომ გერმანიიდან მიღებული ბოლო ცნობები კიდევ ერთხელ აჩვენებს სწრაფი და მკაცრი მოქმედების აუცილებლობას. მისი თქმით, ახალი ინიციატივა „გადამწყვეტი ინსტრუმენტი“ უნდა გახდეს ევროპული ბაზრის დასაცავად.
კანონპროექტის მთავარი პრინციპია ე.წ. Made in Europe პრეფერენცია, რომლის მიხედვითაც სახელმწიფო შესყიდვებში უპირატესობა ევროპაში წარმოებულ საქონელს მიენიჭება. ინიციატივის მხარდამჭერები მიიჩნევენ, რომ ევროკავშირმა საკუთარი ინდუსტრია უფრო აქტიურად უნდა დაიცვას, თუმცა ოპონენტები მას პროტექციონისტულ ნაბიჯად აფასებენ.
კრიტიკოსების თქმით, ახალი წესები, შესაძლოა, კომპანიებისთვის ზედმეტად რთულ სამართლებრივ ჩარჩოდ იქცეს, გაზარდოს ფასები და ამავდროულად შეზღუდოს ისეთი პარტნიორი ქვეყნების წვდომა ბაზარზე, როგორებიც არიან კანადა, გაერთიანებული სამეფო და იაპონია.
POLITICO-ს ცნობით, ამ ეტაპზე ევროკავშირსა და წევრ ქვეყნებს შორის მოლაპარაკებები მხოლოდ ახლა იწყება, მას შემდეგ რაც ევროკომისიამ კანონპროექტი მარტში სამი თვით დაგვიანებით წარადგინა. ოფიციალური პირები აღიარებენ, რომ წლის ბოლომდე შეთანხმების მიღწევა რთული იქნება, მიუხედავად იმისა, რომ ეს „ერთი ევროპა, ერთი ბაზრის“ სტრატეგიით გათვალისწინებულ ვადებში უნდა მოხდეს.