POLITICO: FBI-ს დირექტორი, კეშ პატელი მიმდინარე წლის ბოლოს, სავარაუდოდ ოქტომბრის შუა რიცხვებში, რუსეთში ვიზიტს გეგმავს

გამოძიების ფედერალური ბიუროს (FBI) დირექტორი, კეშ პატელი მიმდინარე წლის ბოლოს, სავარაუდოდ ოქტომბრის შუა რიცხვებში, რუსეთში ვიზიტს გეგმავს. ინფორმაციას ამის შესახებ გამოცემა POLITICO ინფორმირებულ წყაროებზე დაყრდნობით ავრცელებს.

აღნიშნული გეგმები იმ ფონზე იკვეთება, როცა ვაშინგტონი და მოსკოვი უკრაინაში მიმდინარე ომის გამო კვლავ დაძაბულ ურთიერთობაში რჩებიან, ხოლო ამერიკელი კანონმდებლები რუსეთის წინააღმდეგ ახალი მძიმე სანქციების დაწესებას მოითხოვენ.

ვიზიტის გეგმებთან დაკავშირებით ინფორმირებული ამერიკული ოფიციალური პირის ცნობით, პატელის ვიზიტი რუსეთში 14-15 ოქტომბრამდეა დაგეგმილი. ის ჯერ მოსკოვს, შემდეგ კი სანქტ-პეტერბურგს ეწვევა.

ოფიციალური პირის თქმით, მისი მასპინძელი, სავარაუდოდ, FSB იქნება - რუსეთის უსაფრთხოების სამსახური.

უცნობია, შეხვდება თუ არა პატელი რუსეთის ლიდერს, ვლადიმირ პუტინს ან მის რომელიმე თანაშემწეს. ასევე ბუნდოვანია, რა საკითხებია შეტანილი მის სამუშაო დღის წესრიგში.