POLITICO: საფრანგეთი, იტალია და ესპანეთი იმ 10 ქვეყანას შორის არიან, რომლებიც ევროკომისიის გეგმას ეწინააღმდეგებიან - ინიციატივა ევროკავშირის მომდევნო შვიდწლიან ბიუჯეტში დაფინანსების გაცემის პოლიტიკურ რეფორმებთან დაკავშირებას ითვალისწინებს

საფრანგეთი, იტალია და ესპანეთი იმ 10 ქვეყანას შორის არიან, რომლებიც ევროკომისიის გეგმას ეწინააღმდეგებიან - ინიციატივა ევროკავშირის მომდევნო შვიდწლიან ბიუჯეტში დაფინანსების გაცემის პოლიტიკურ რეფორმებთან დაკავშირებას ითვალისწინებს. ამის შესახებ POLITICO-ს დისკუსიებში ჩართულმა ოთხმა დიპლომატმა განუცხადა.

ევროკომისიის საბიუჯეტო გეგმის მიხედვით, რომელზეც ევროპულ დედაქალაქებში ამჟამად მოლაპარაკებები მიმდინარეობს, ევროკავშირის ქვეყნებს თანხების მისაღებად მრავალი დაბრკოლების გადალახვა დასჭირდებათ, მათ შორის ისეთ შესაძლოა უაღრესად სენსიტიურ საკითხებზე, როგორიცაა საპენსიო ასაკის გაზრდა.

აღნიშნულ იდეას ათივე მთავრობა ოთხშაბათს, ევროკავშირის ელჩების შეხვედრაზე დაუპირისპირდა, რამაც ბლოკის 2028-2034 წლების თითქმის 2-ტრილიონიანი ბიუჯეტის გარშემო მიმდინარე დაძაბულ მოლაპარაკებებში ახალი დაპირისპირების კერა გააჩინა.

ბიუჯეტის ძირითადი კონტრიბუტორები, მათ შორის იტალია, საფრანგეთი და ესპანეთი, ისევე როგორც ევროკავშირის სახსრების წმინდა მიმღებები, როგორიცაა უნგრეთი, მალტა და პოლონეთი, ოთხშაბათის შეხვედრაზე „რეფორმების სანაცვლოდ დაფინანსების“ მოდელის წინააღმდეგ გამოვიდნენ.

კრიტიკოსების თქმით, ამგვარმა მიდგომამ შესაძლოა ეროვნული მთავრობების ძალაუფლება რეგიონების ხარჯზე გაზარდოს და გამოიწვიოს ისეთი რეფორმების თავსმოხვევა, რომლებსაც პოლიტიკური მხარდაჭერა არ გააჩნია.

„ჩვენ არ გვინდა, რომ [ევროკომისიის] რეკომენდაციები თავსმოხვეულ ვალდებულებებად გადაიქცეს“, - აღნიშნა ევროკავშირის დიპლომატმა.