POLITICO: ტრამპს ირანთან ომის გამო პირველი მარცხი ელოდება

აშშ-ის პრეზიდენტს დონალდ ტრამპს ირანთან ომის გამო პირველი მარცხი ელოდება. სტატიას ამ შინაარსით POLITICO ავრცელებს.

გამოცემის ინფორმაციით, საუბარია პოლიტიკურ და არა სამხედრო მარცხზე.

საქმე ისაა, რომ რამდენიმე დღის წინ აშშ-ის კონგრესის სენატმა მიიღო კანონპროექტი, რომელიც ტრამპს სამხედრო კამპანიის წარმოებას უკრძალავს. კანონპროექტის მიღება „რესპუბლიკური“ პარტიის ზოგი წევრის თანხმობის წყალობით მოხერხდა, რაც იმაზე მიუთითებს, რომ ირანთან ომი ტრამპის პარტიაშიც არაპოპულარული ხდება.

როგორც POLITICO იუწყება, მიუხედავად იმისა, რომ კანონპროექტს წარმომადგენელთა პალატაშიც უნდა უყარონ კენჭი, ხოლო შემდეგ, დიდი ალბათობით, ტრამპი მას ვეტოს დაადებს, ეს მაინც მისი წარუმატებლობა იქნება.

„დღეს არსებული ვითარება ისეთია, რომ „რესპუბლიკურ“ პარტიაში მზად არიან უთხრან ტრამპს: „ჩვენ გარეშე ამ ომს თქვენ ვერ აწარმოებთ“, - განაცხადა „დემოკრატმა“ სენატორმა ტიმ კეინმა.

მოსალოდნელია, რომ „რესპუბლიკელები“ კანონპროექტის დაბლოკვას წარმომადგენელთა პალატაში შეეცდებიან, თუმცა „დემოკრატები“ ამბობენ, რომ ინიციატივას მზარდი პოპულარობა აქვს თავად ტრამპის მხარდამჭერებში.