პოლონეთის კიბერდანაშაულთან ბრძოლის ცენტრალური ბიუროს წარმომადგენელი: გვინდა, განსაკუთრებული მადლობა გადავუხადოთ გენერალურ პროკურატურას თბილისში, ბათუმის საოლქო პროკურატურას, საქართველოს პოლიციას, ყველა ოფიცერს და თანამშრომელს, რომლებიც მონაწილეობას იღებდნენ ადგილზე ჩატარებულ ოპერაციაში
გვინდა, განსაკუთრებული მადლობა გადავუხადოთ გენერალურ პროკურატურას თბილისში, ბათუმის საოლქო პროკურატურას, საქართველოს პოლიციას, ყველა ოფიცერს და თანამშრომელს, რომლებიც მონაწილეობას იღებდნენ ადგილზე ჩატარებულ ოპერაციაში, - განაცხადა პოლონეთის რესპუბლიკის კიბერდანაშაულთან ბრძოლის ცენტრალური ბიუროს წარმომადგენელმა დამიან მაზურიმ საქართველოს გენერალურ პროკურატურაში გამართულ ბრიფინგზე.
როგორც დამიან მაზურიმ აღნიშნა, ეფექტური თანამშრომლობისა და ერთობლივი ძალისხმევის შედეგად, ყველა დაგეგმილ მიზანს მიაღწიეს.
„მოგესალმებით პოლიციის კიბერდანაშაულთან ბრძოლის ცენტრალური ბიუროს ხელმძღვანელისა და ყველა ოფიცრის სახელით და გვსურს, ღრმა მადლიერება გამოვხატოთ ყველა იმ დაწესებულებისა და უწყების მიმართ, რომლებიც მონაწილეობდნენ ოპერაციაში, რომელიც ხორციელდებოდა ლოძის საოლქო პროკურატურის ზედამხედველობით და მიმართული იყო საერთაშორისო ორგანიზებული დანაშაულებრივი ჯგუფის წინააღმდეგ. გვინდა, განსაკუთრებული მადლობა გადავუხადოთ გენერალურ პროკურატურას თბილისში, ბათუმის საოლქო პროკურატურას, საქართველოს პოლიციას, ყველა ოფიცერსა და თანამშრომელს, რომლებიც მონაწილეობას იღებდნენ ადგილზე ჩატარებულ ოპერაციაში.
ჩვენი ეფექტური თანამშრომლობისა და ერთობლივი ძალისხმევის შედეგად, ჩვენ მივაღწიეთ ყველა დაგეგმილ მიზანს. ჩვენი მუშაობის შედეგები მოგვცემს შესაძლებლობას, რომ საქმე შემდგომშიც გავაგრძელოთ. გმადლობთ თქვენი პროფესიონალური მიდგომისთვის, ფასდაუდებელი მხარდაჭერისთვის და უაღრესად ეფექტური თანამშრომლობისთვის“, - აღნიშნა პოლონეთის რესპუბლიკის კიბერდანაშაულთან ბრძოლის ცენტრალური ბიუროს წარმომადგენელმა.
როგორც ცნობილია, საქართველოს პროკურატურის, ამერიკის შეერთებული შტატების საიდუმლო სამსახურის, პოლონეთის რესპუბლიკის კიბერდანაშაულთან ბრძოლის ცენტრალური ბიუროსა და ლოძის საოლქო პროკურატურის, ასევე საქართველოს შინაგან საქმეთა სამინისტროს და ფინანსთა სამინისტროს საგამოძიებო სამსახურების თანამშრომლებმა საქართველოში ფართომასშტაბიანი ღონისძიება ჩაატარეს.
