პოლონეთის საგარეო საქმეთა მინისტრი ილონ მასკის Starlink-ის ქსელისთვის ვარშავის მიერ გამოყოფილი 50 მილიონი დოლარის ყოველწლიური დაფინანსების გადახედვით დაიმუქრა

პოლონეთის საგარეო საქმეთა მინისტრი, რადოსლავ სიკორსკი ილონ მასკის Starlink-ის ქსელისთვის ვარშავის მიერ გამოყოფილი 50 მილიონი დოლარის ყოველწლიური დაფინანსების გადახედვით დაიმუქრა. ამით ის შეუერთდა მთავრობის მზარდ უკმაყოფილებას როუმინგის ახალ შეზღუდვებზე, რომლებიც ამ თვის ბოლოს პოლონელ აბონენტებს შეეხება.

„შეწყვიტე Starlink-ის პოლონელი მომხმარებლების დისკრიმინაცია, თორემ შეიძლება გადავხედოთ შენი მომსახურებისთვის წელიწადში 50 მილიონი დოლარის გადახდას“, - მიმართა სიკორსკიმ მასკს.

საგარეო საქმეთა მინისტრის აღშფოთება მოჰყვა Starlink-ის გადაწყვეტილებას, რომლის მიხედვითაც, პოლონეთი ევროპული როუმინგის ერთიანი ზონიდან გამოირიცხა.

ეს ზონა 30-ზე მეტ ქვეყანას მოიცავს, მათ შორის გერმანიას, ჩეხეთს, სლოვაკეთსა და ლიეტუვას. აღნიშნულ ზონაში შემავალ მომხმარებლებს შეუძლიათ ტერმინალები საზღვარგარეთ საერთაშორისო მოხმარების შეზღუდვების გარეშე გადაიტანონ. პოლონელ მომხმარებლებს კი მოგზაურობისას ახლა დამატებითი მოთხოვნების შესრულება მოუწევთ.

პოლონეთის ციფრულ საკითხთა მინისტრი, კშიშტოფ გავკოვსკიც დაუპირისპირდა მასკს - მან Starlink-ის მშობელი კომპანია SpaceX-ი პოლონელების მეორეხარისხოვან მომხმარებლებად განხილვაში დაადანაშაულა და მოითხოვა, მკაფიოდ განმარტონ ამ ცვლილების სამართლებრივი საფუძველი.