პოლონეთის სეიმის ვიცე-სპიკერი ევროკავშირში უკრაინის გაწევრიანების ბლოკირებისკენ მოუწოდებს
ულტრამემარჯვენე პარტია „კონფედერაციის“ ლიდერი, პოლონეთის სეიმის ვიცე-სპიკერი კშიშტოფ ბოსაკი ქვეყნის ხელისუფლებას მოუწოდებს ევროკავშირში უკრაინის გაწევრიანების საკითხი დაბლოკოს იმის გამო, რომ უკრაინის ხელისუფლებამ ერთ-ერთ სამხედრო ქვედანაყოფს „უკრაინის მეამბოხე არმიის გმირების“ სახელი მიანიჭა. ინფორმაციას პოლონური მედია ავრცელებს.
ბოსაკის აზრით, პირველ რიგში, პოლონეთმა უნდა გამოაცხადოს, რომ ევროკავშირში უკრაინის გაწევრიანებას დაბლოკავს, სანამ კიევი „ბოროტმოქმედების კულტს არ უარყოფს და ვოლინის ტრაგედიის მსხვერპლთა ექსჰუმაციას არ განახორციელებს“.
პოლონეთის სეიმის ვიცე-სპიკერის განცხადებით, ვარშავა კიევთან მიმართებით უფრო მკაცრ ნაბიჯებზე უნდა გადავიდეს.
„თუ ჩვენ უკრაინელებზე ნამდვილი ზეწოლის განხორციელება გვსურს, კონკრეტულ მკაცრ ნაბიჯებზე უნდა გადავიდეთ, რომლებსაც ეფექტიანი გავლენა ექნებათ“, - განაცხადა ბოსაკმა.
პოლონელმა პოლიტიკოსმა აგრეთვე მოუწოდა მთავრობას შეწყვიტოს Starlink-ის გადახდა, რომელსაც უკრაინელი სამხედროები წარმატებით იყენებენ. ის მთავრობას სთავაზობს უარი თქვას ევროკავშირის სხვა წევრ სახელმწიფოებთან ერთად უკრაინისთვის კრედიტის აღებაზე.
ცნობისთვის, რამდენიმე დღის წინ უკრაინის პრეზიდენტმა ვოლოდიმირ ზელენსკიმ უკრაინის შეიარაღებული ძალების ერთ-ერთ ქვედანაყოფს „უკრაინის მეამბოხე არმიის გმირების“ სახელი მიანიჭა. პოლონური მხარე მიიჩნევს, რომ „უკრაინის მეამბოხე არმია“ ვოლინის ტრაგედიასთან არის დაკავშირებული.
