პოლონეთის თავდაცვის მინისტრი უკრაინას მოუწოდებს, სამიზნეები უფრო დიდი სიზუსტით შეარჩიოს - „მიუხედავად იმისა, რომ გვესმის უკრაინის ტაქტიკური ამოცანები ამ ომში, მან ნატოს წევრი ქვეყნების ტერიტორია უნდა დაიცვას“
ესტონეთის თავზე დრონთან დაკავშირებული ინციდენტის შემდეგ, პოლონეთის თავდაცვის მინისტრმა უკრაინას მოუწოდა, სამიზნეები უფრო დიდი სიზუსტით შეარჩიოს. ვლადისლავ კოსინიაკ-კამიშის განცხადებით, მსგავსი შემთხვევები შესაძლოა რუსეთის ინტერესებში შედიოდეს.
გუშინ ესტონეთის ტერიტორიის თავზე დრონი ჩამოაგდეს. პოლონეთის თავდაცვის მინისტრის განცხადებით, იგი უკრაინიდან იყო გაშვებული.
„უკრაინამ - და ამას სამხედროები და ნატოც ამბობენ - თავისი სამიზნეები გაცილებით დიდი სიზუსტით უნდა შეარჩიოს, რათა ამან საფრთხე არ შეუქმნას ნატოს წევრი ქვეყნების უსაფრთხოებას“, - განაცხადა კოსინიაკ-კამიშმა.
მან დასძინა, რომ რუსეთს შეუძლია მსგავსი ინციდენტები საკუთარი მიზნებისთვის გამოიყენოს - როგორც პროპაგანდისთვის, ისე ესკალაციისა და ჰიბრიდული ომის გასაძლიერებლად.
მინისტრმა ხაზგასმით აღნიშნა, რომ მას ესმის ომში უკრაინის ტაქტიკური მიზნები, თუმცა მიიჩნევს, რომ ეს არ ათავისუფლებს მას მოკავშირეების უსაფრთხოებაზე პასუხისმგებლობისგან.
„მიუხედავად იმისა, რომ გვესმის მისი ტაქტიკური ამოცანები ამ ომში, მან ნატოს წევრი ქვეყნების ტერიტორია უნდა დაიცვას“, - დასძინა მან.
19 მაისს, ნატოს გამანადგურებელმა, პირველად ისტორიაში, ესტონეთის ტერიტორიის თავზე დრონი ჩამოაგდო. უპილოტო საფრენი აპარატი ქვეყნის სამხრეთით მდებარე ვირტსიარვის ტბაში ჩავარდა.
ესტონეთის თავდაცვის მინისტრმა, ჰანო პევკურმა აღნიშნა, რომ საქმე, დიდი ალბათობით, ეხება უკრაინულ დრონს, რომელმაც მარშრუტს რუსული რადიოელექტრონული ბრძოლის სისტემების მხრიდან დაბრკოლებების შექმნის გამო გადაუხვია.
იმედი
წყარო: imedinews.ge