პორტუგალიის პრემიერი ევროპას, უკრაინასა და რუსეთს შორის პირდაპირ დიალოგს უჭერს მხარს

პორტუგალიის პრემიერ-მინისტრმა, ლუიშ მონტენეგრუმ განაცხადა, რომ უკრაინაში სამშვიდობო პროცესი უშუალოდ ყველა მხარეს უნდა მოიცავდეს, მათ შორის რუსეთსა და ევროპის ქვეყნებს.

აღნიშნული განცხადება მას შემდეგ გაჟღერდა, რაც კრემლმა გაავრცელა ინფორმაცია, რომ რუსეთის პრეზიდენტი, ვლადიმირ პუტინი მზად არის ევროპასთან უკრაინის კონფლიქტსა და ევროპულ უსაფრთხოებაზე მოლაპარაკებებისთვის.

მონტენეგრუმ ხაზგასმით აღნიშნა, რომ მოლაპარაკებების პროცესში მუდმივად გარე მედიაციაზე დამოკიდებულება არ უნდა არსებობდეს.

„უკრაინაში სამშვიდობო პროცესი მოითხოვს [მხარეების] მაგიდასთან დაჯდომასაც. რუსეთი და ევროპა არ შეიძლება სამუდამოდ იყვნენ დამოკიდებულნი იმ პირების შუამავლობაზე, რომლებიც, მთელი მონდომებითა და სრულიად დამსახურებულად, ძალისხმევას არ იშურებენ უკრაინაში სამართლიანი და გრძელვადიანი მშვიდობის უზრუნველსაყოფად“, - აღნიშნა მან.

პრემიერ-მინისტრმა ასევე აღნიშნა, რომ ევროპამ უფრო აქტიური როლი უნდა იკისროს დიალოგის ხელშეწყობაში.

„ევროპამ თავად უნდა აიღოს ინიციატივა ამ დიალოგის დასაწყებად ჩართულ მხარეებთან - ბუნებრივია, უკრაინასთან და ასევე რუსეთთან, რადგან ეს არის ერთადერთი გზა, რომლითაც რეალურად შევიძლებთ სამშვიდობო პროცესის მიღწევას“, - განაცხადა მან.