პროკურორი ხაბეიშვილი-ზოდელავას სასამართლო პროცესზე მოსამართლეს: მომეტებულად სახიფათოა სახელმწიფო დამხობის მოწოდება - მშვიდობიანი დამხობა სიტყვების თამაშია, მოგმართავთ, ბრალდებულებს თითოეული ქმედების სამართლიანი სასჯელი განუსაზღვროთ

ბატონო მოსამართლე, ჩემ მიერ ჩამოყალიბებული პოზიციისგან განსხვავებული მსჯელობის შემთხვევაში მივიღებთ მოცემულობას, რომ ხელისუფლების დამხობისკენ გამიზნული პირდაპირი მოწოდებები თურმე ჩვეულებრივი მოვლენაა ამ ქვეყანაში, - ასე მიმართა ხაბეიშვილი-ზოდელავას სასამართლო პროცესზე პროკურორმა ბექა ხუნაშვილმა მოსამართლეს.

მისი თქმით, მომეტებულად სახიფათოა სახელმწიფო დამხობის მოწოდება და ამიტომაც არის ეს ქმედება კრიმინალიზებული.

„ბატონო მოსამართლე, ჩემ მიერ ჩამოყალიბებული პოზიციისგან განსხვავებული მსჯელობის შემთხვევაში მივიღებთ მოცემულობას, რომ ხელისუფლების დამხობისკენ გამიზნული პირდაპირი მოწოდებები თურმე, ჩვეულებრივი მოვლენაა ამ ქვეყანაში; რომ სხვადასხვა პოლიტიკური ინტერესის მიხედვით, პოლიციელთათვის განსაკუთრებით დიდი ოდენობით თანხების გადახდის დაპირება ლეგიტიმური ქმედებაა. რომ ყოფილ მთავარ პროკურორს სრული უფლება აქვს, უხეშად ჩაერიოს ნებისმიერი გამომძიებლის საქმიანობაში და ა.შ. რაც ბუნებრივია, თქვენს წინაშე წარმოდგენილი მტკიცებულებების სრული უგულებელყოფა იქნება.

მომეტებულად სახიფათოა სახელმწიფო დამხობის მოწოდება და ამიტომაც არის ეს ქმედება კრიმინალიზებული. მშვიდობიანი დამხობა სიტყვების თამაშია, მშვიდობიანი დამხობა წარმოუდგენელი ოქსიმორონია. მოგმართავთ, ბრალდებულებს თითოეული ქმედების სამართლიანი სასჯელი განუსაზღვროთ", - განაცხადა პროკურორმა.

თბილისის საქალაქო სასამართლოში ლევან ხაბეიშვილისა და მურთაზ ზოდელავას საქმეზე დასკვნითი სხდომა მიმდინარეობს.

ლევან ხაბეიშვილს ბრალად ედება უკანონო ქმედების ჩასადენად მოხელისათვის ქრთამის დაპირება და სახელმწიფო ხელისუფლების დამხობისაკენ საქვეყნოდ მოწოდება. ხაბეიშვილი სახელმწიფო უსაფრთხოების სამსახურმა ქრთამის სახით მოხელეებისთვის ფულადი თანხების საჯარო დაპირების ფაქტზე 11 სექტემბერს დააკავა.