რატი იონათამიშვილი: ძალიან მძიმე პროცესებია, რასაც მოლდოვას მაგალითზე ვხედავთ. ეს პროცესები არ გვიკვირს, სააკაშვილი გვყავდა, რომელიც იყო ჩვენი ქვეყნის პრეზიდენტი, შემდეგ სხვა ქვეყნის გუბერნატორი გახდა და ამით ამაყობდა

მოლდოვას საგარეო საქმეთა მინისტრის განცხადება, რომ იგი რუმინეთის შემადგენლობაში შესვლის მომხრეა, „ქრონიკასთან“ საუბრისას საქართველოს პარლამენტის ადამიანის უფლებათა დაცვის კომიტეტის თავმჯდომარე რატი იონათამიშვილმა შეაფასა.

იონათამიშვილის თქმით, სინამდვილეში ძალიან მძიმე პროცესებია, რასაც მოლდოვას მაგალითზე ვხედავთ.

როგორც მან აღნიშნა, გადაწყვეტილების მიმღები პირები, მათ შორის პრეზიდენტი, საგარეო საქმეთა მინისტრი, პირდაპირ გამოდიან საკუთარი ქვეყნის სუვერენიტეტის წინააღმდეგ მაშინ, როდესაც პირველ რიგში ეს ადამიანები უნდა იცავდნენ საკუთარი ქვეყნის სუვერენიტეტს.

„იქნება ეს პრეზიდენტი თუ საგარეო საქმეთა მინისტრი, საკუთარი სახელმწიფოებრივი ინტერესებით უნდა მოქმედებდნენ.

სინამდვილეში, ავლენენ რომ მათი მთავარი მიზანია სხვა ქვეყნის გუბერნიად ქცევა. ეს პროცესები არ გვიკვირს, სააკაშვილი გვყავდა, რომელიც სამწუხაროდ, ჩვენი ქვეყნის პრეზიდენტი იყო, შემდეგ სხვა ქვეყნის გუბერნატორი გახდა და ამით ამაყობდა“, - აღნიშნა რატი იონათამიშვილმა.