Reuters: არაბთა გაერთიანებული საამიროები ირანისთვის მილიარდობით დოლარის გაყინული ფულის გადასაცემად ემზადება

არაბთა გაერთიანებული საამიროები მილიარდობით გაყინული დოლარის ირანისთვის გადაცემას დათანხმდა. ინფორმაციას Reuters-ი ოთხ წყაროზე დაყრდნობით ავრცელებს.

სააგენტოს ცნობით, გადაწყვეტილება ტაქტიკურ ცვლილებად განიხილება მას შემდეგ, რაც აშშ-ისა და ისრაელის მიერ ისლამურ რესპუბლიკასთან წარმოებული ომის პერიოდში ირანი სპარსეთის ყურის მდიდარ არაბულ სახელმწიფოზე რამდენიმე კვირის განმავლობაში თავდასხმებს ახორციელებდა.

ამ ნაბიჯის შესახებ ინფორმაცია, რომელიც აქამდე საჯაროდ არ გავრცელებულა, დროში ემთხვევა თეირანსა და ვაშინგტონს შორის მიმდინარე ფართო მოლაპარაკებების დასკვნით ეტაპს, რომლის მიზანიც ომის დასრულებაა.

დიპლომატების თქმით, მოლაპარაკებები, შესაძლოა, მოიცავდეს აშშ-ის სანქციების გამო უცხოურ ბანკებში ნავთობის გაყიდვით მიღებული გაყინული ირანული ფულის გათავისუფლებას. საუბარია ათობით მილიარდ დოლარზე.

ორმა რეგიონულმა წყარომ Reuters-ს განუცხადა, რომ საამიროები 10 მილიარდი დოლარის გამოყოფას დათანხმდა, საიდანაც 3 მილიარდ დოლარზე მეტი უკვე გადარიცხულია.

შეთანხმების დეტალებში გარკვეულმა კიდევ ორმა წყარომ განაცხადა, რომ საერთო თანხა 20 მილიარდ დოლარს შეადგენს. მათი თქმით, ეს ნაბიჯი ირანის მხრიდან საამიროების წინააღმდეგ თავდასხმების შეწყვეტის სანაცვლოდ შეთანხმდა.

ერთ-ერთი წყაროს ინფორმაციით, შეთანხმების ფარგლებში პირველი ტრანში, 3 მილიარდი დოლარი, უკვე ხელმისაწვდომი გახდა.