Reuters: ათასობით ალბანელი გამოვიდა ტირანის ქუჩებში იმ სამშენებლო პროექტის გასაპროტესტებლად, რომელიც დონალდ ტრამპის სიძესთან, ჯარედ კუშნერთან დაკავშირებული კომპანიის მიერ იგეგმება

სამშაბათს საღამოს ათასობით ალბანელი გამოვიდა ტირანის ქუჩებში იმ სამშენებლო პროექტის გასაპროტესტებლად, რომელიც დონალდ ტრამპის სიძესთან, ჯარედ კუშნერთან დაკავშირებული კომპანიის მიერ იგეგმება ადრიატიკის ზღვის სანაპიროს ეკოლოგიურად მნიშვნელოვან ნაწილში. ინფორმაციას ამის შესახებ სააგენტო Reuters-ი ავრცელებს.

1.4 მილიარდი ევროს ღირებულების კურორტის მშენებლობას კუშნერის საინვესტიციო ფირმა Affinity Partners-ი ხელმძღვანელობს.

პროექტი ალბანეთის ერთ-ერთ კუნძულსა და სანაპიროს აუთვისებელ ზოლზე იგეგმება, „ვიოსა-ნარტას“ დაცული ლანდშაფტის მახლობლად - ჭარბტენიან ზონაში, რომელიც ფლამინგოების, სელაპებისა და ზღვის კუების ბინადრობის ადგილს წარმოადგენს.

გარემოსდამცველები ეწინააღმდეგებიან ამ გეგმას, რადგან მათი თქმით, პროექტი ასობით ჰექტარ ხელუხლებელ პლაჟს დააზიანებს. დეველოპერები კი აცხადებენ, რომ სამუშაოებს პასუხისმგებლობით წარმართავენ.

„ჩვენს მთავარ ამოცანად კვლავაც რჩება გარემოზე პასუხისმგებლიანი ზრუნვა, მისი გაუმჯობესება, ახალი სამუშაო ადგილების შექმნა და ადგილობრივი მოსახლეობისთვის გრძელვადიანი სარგებლის მოტანა. ჩვენ პატივს ვცემთ მიმდინარე საზოგადოებრივ და ინსტიტუციურ პროცესებს“, - განაცხადა აშერ აბეჰსერამ, კომპანია Sazan Real Estate Development LLC-ის თავმჯდომარემ, რომელიც ამ გეგმებს კუშნერის ფირმასთან პარტნიორობით ავითარებს.